Një bunker i vjetër në lagjen Ulpiana të Prishtinës, dikur vend strehimi në kohë krizash, tani ka marrë një frymë të re – është shndërruar në një qendër moderne për art dhe kulturë, shkruan Katror.info.
Falë një procesi rikonstruktimi që ka transformuar këtë hapësirë të errët, me lagështi dhe të mbushur me mbeturina, banorët e lagjes tash do të kenë në dispozicion një ambient të ndritshëm, të klimatizuar dhe mbi të gjitha – të hapur për të gjithë.
Fëmijët që më parë e shmangnin këtë vend, sot hyjnë aty me kureshtje, ide dhe ëndrra për t’u zhvilluar. Hapësira që dikur përfaqësonte frikë e izolim, sot është kthyer në një vatër të gjallë të komunitetit, një simbol i bashkimit dhe kreativitetit.
Mundesh me e lexu edhe…
Kjo qendër e re për art dhe kulturë u mundësua falë financimit nga Qeveria e Dukatit të Madh të Luksemburgut, në partneritet me UNDP Kosovë, ndërsa menaxhimi i saj do të bëhet nga Komuna e Prishtinës.
“Kryeqyteti i kthen edhe kujtimet më të errëta në hapësira që frymëzojnë të ardhmen”, u theksua në njoftim, duke reflektuar vizionin për një Prishtinë ku çdo hapësirë ka potencial për jetë, frymëzim dhe bashkim./Katror.info
