Formati i ri i Ligës së Kampionëve nis të martën, pas më shumë se gjashtë vjet planesh, një propozimi të dështuar dhe një nisme jo të realizuar të Superligës evropiane.
Në fund, klubet që kanë kërkuar ndryshime nga UEFA dhe krijuan trazira në futbollin evropian, morën atë që deshën: më shumë ekipe, më shumë ndeshje, më shumë kundërshtarë të nivelit më të lartë dhe më shumë para.
Tani janë 36 skuadra dhe jo 32 sa ishin më parë. Secila do t’i luajë tetë ndeshje në vend të gjashtë, kundër tetë kundërshtarëve të ndryshëm, dhe jo ndaj tre kundërshtarëve sa i kishin më parë në fazën grupore.
Mbrëmja e së martës do të ketë menjëherë ndeshje të forta.
Kylian Mbappe me klubin e tretë do ta kërkojë titullin e parë. Me 15 herë kampionin e Evropës, Real Madridin, Mbappe do të jetë nikoqir i Stuttgartit. Mbappe shkoi deri në gjysmëfinale në vitin 2017 me Monacon dhe ishte finalist në vitin 2020 me Paris Saint-Germainin. Por trofeun evropian nuk e ka fituar ende, shkruan Koha.net.
Të gjitha 36 ekipet do të luajnë në format të ligës që përfundon në muajin janar, dhe jo si më parë që luanin në fazë grupore e cila mbyllej në dhjetor.
UEFA ka vendosur që nga e marta deri të enjten të luhen nga gjashtë ndeshje. Pra 18 gjithsej ku përfshihen të gjitha 36 skuadrat.
Formati i ri
Faza e ligës deri në janar është e thjeshtë. Secila skuadër do të luajë tetë ndeshje – katër në shtëpi, katër në udhëtim. Do të fitojë nga tri pikë për fitore, dhe një për barazim.
Tetë kundërshtarët e ndryshëm ishin caktuar nga një program softuerik, që zgjidhte nga dy skuadra nga secila prej katër vazove. Bartësit ishin zgjedhur në bazë të të arriturave në pesë vjetët e fundit në garat e UEFA-s.
Kampionët e fundit, Real Madridi, Manchester City dhe Bayern Munichu, ishin bartës. Skuadrat me renditje më të dobët ishin në vazon e katërt, dhe aty përfshiheshin debutuesit Girona dhe Bresti, si dhe të rikthyerit, Aston Villa, Bologna dhe Stuttgarti.
Avancimi në fazën nokaut është më i ndërlikuar.
UEFA ka njoftuar se ekipeve do t’u duhen të paktën tetë pikë nga tetë ndeshje, për të qenë në garë për të kaluar tutje.
Tetë skuadrat e para në tabelë më 29 janar avancojnë direkt në 1/8 e finales, ndeshjet e së cilave luhen në muajin mars.
Ekipet nga vendi i nëntë deri në vendin e 24-t do të luajnë në raundin e plejofit, që është fazë para asaj të 1/8 së finales. Ndeshjet e plejofit zhvillohen në muajin shkurt.
Ekipet nga vendi i nëntë deri në vendin e 16-të do ta kenë përparësinë e terrenit vendës në ndeshjen kthyese, ndaj skuadrave prej vendit të 17-të deri në atë të 24-t.
12 skuadrat e fundit në fazën e ligës do të eliminohen. Pra nuk avancojnë tutje.
Tetë fituesit e ndeshjeve të plejofit do të avancojnë tutje por jo si bartës në 1/8 e finales. Automatikisht do të caktohet edhe rruga deri në finale. Kjo e zëvendëson sistemin e vjetër të shortit, që tërhiqej për çerekfinale dhe gjysmëfinale.
E marta nis me rimeç
Periudha e re nis në orën 18:45 me dy ndeshje, me tri fitues të Kupave Evropiane. Juventusi e pret PSV Eindhovenin dhe Aston Villa udhëton tek Young Boysi. Këto janë ndeshjet e para mes tyre. Ndeshjet tjera luhen nga ora 21:00.
Po ashtu, do të luajnë katër skuadra me më së shumti trofe të Kupave Evropiane dhe Liga të Kampionëve në historinë 70-vjeçare.
Përderisa Reali luan kundër Stuttgartit, gjashtë herë fituesi Bayern Munichu e pret Dinamon e Zagrebit, dhe synon që të shkojë në 40 ndeshje pa disfatë në shtatë vjet të fazave grupore.
Por vëmendja më e madhe do të jetë në “San Siro”, ku Milani luan ndaj Liverpoolit. Milani titullin e fundit nga shtatë sa i ka gjithsej, e fitoi ndaj Liverpoolit në vitin 2007. Ajo finale ishte përsëritje e “Mrekullisë së Stambollit” në vitin 2005.
Liverpooli në atë finale u kthye nga disavantazhi 3:0 në pjesën e parë, për ta fituar në fund titullin e pestë, nga gjashtë sa i ka në total.
Man. City – Inter, të mërkurën
Në finale në Stamboll së fundmi janë takuar edhe kampionët aktualë të Anglisë dhe Italisë. Manchester City, me Erling Haalandin në formë të jashtëzakonshme, e pret Interin, skuadrën që e mposhti 1:0 në finale të vitit 2023. City është i pamposhtur në Ligën e Kampionëve në ndeshjet në shtëpi për gjashtë vjet.
E mërkura është edhe nata e “fytyrave” të reja. Girona, që ka të njëjtit pronarë, ata të grupit të Manchester Cityt, do të debutojë në udhëtim te Paris Saint-Germaini.
Bologna e pret Shakhtarin, në ndeshjen e parë në këtë garë që nga raundi preliminar para 60 vjetësh. Bologna luan në “Stadio Renato Dall’Ara” që prej vitit 1927. Ky stadium ka qenë edhe nikoqir i ndeshjeve të Kupës së Botës 1934.
Leverkuseni dhe Atalanta luajnë të enjten
Finalistët e Ligës së Evropës, Atalanta e Bayer Leverkuseni, tani së bashku do të ngjiten në një skenë më madhështore.
Humbja e vetme e Bayer Leverkusenit në gjithë sezonin e plotë nën drejtimin e trajnerit Xabi Alonso ishte ajo në finale të Ligës së Evropës nga Atalanta. Tani Leverkuseni rikthehet në “Champions League” në Feyenoord. Atalanta e pret Arsenalin që nuk do ta ketë Martin Odegaardin për shkak të lëndimit në nyjën e këmbës.
Liderja e La Ligas, Barcelona, me yllin 17-vjeçar Lamine Yamal, do të udhëtojë te Monaco, ndërsa ndeshja e vetme jo derbi nga 18 ballafaqimet në total, do të jetë ajo mes Brestit dhe Sturm Grazit.
Bresti, që është formuar para 121 vjetësh, nuk ka luajtur asnjëherë ndeshje evropiane, ndërsa Sturm Grazi pati luajtur në Ligën e Kampionëve para 23 vjetësh. Ndeshja do të luhet në Guingamp, pasi stadiumi ku Bresti luan në shtëpi, nuk është mjaftueshëm modern.
Fondi shpërblyes
UEFA ka vënë të paktën 2.5 miliardë euro në fondin shpërblyes për 36 klube, që është 25 për qind më shumë se në sezonin e kaluar. Fituesi në Munih më 31 maj mund të fitojë më shumë se 160 milionë euro.
Secila skuadër do të përfitojë shpërblimin bazë prej 18.6 milionë eurove, më pas 2.1 milionë euro për secilën fitore në fazën e ligës, dhe 700 mijë euro për barazim.
Edhe pozita më e mirë në tabelë do të shpërblehet. Sa më e lartë të jetë pozita, aq më shumë para fitojnë skuadrat. 9.9 milionë euro do t’i fitojë skuadra që përfundon në vendin e parë në janar.
Bonuset rriten nga 11 milionë euro për secilën skuadër që avancon në fazën nokaut.
Tjetër fond shpërblyes prej 853 milionë eurove ndahet në bazë të rekordeve të skuadrave në garat e UEFA-s dhe në bazë të marrëveshjeve të transmetimit kombëtar e global. /Katror.info
Përgatiti:
