Çdo katër muaj, Fatmir Gërguri ngjet shkallët drejt një prej institucioneve më humane të shëndetësisë. Pritet në mënyrën më të mire të mundshme, për shkak se ai tashmë është bërë pjesë e familjes së madhe të dhuruesve të gjakut.
Për herë të pare në jetën e tij, inxhineri i xehtarisë iu kishte nënshtruar procedurave mjekësore në vitin 1986. Ndërkaq prej vitit 2011 ai është dhurues i rregullt në Qendrën Kombëtare të Kosovës për Transfuzion të Gjakut.
Ky akt human e ka bërë që përveç stafit mjekësor, të lidhet shumë edhe me familjet nevojtare për gjak. Madje me disa prej tyre ka krijuar edhe kujtime të cilat e dëshmojnë aktivizmin e tij.
Mundesh me e lexu edhe...
“Njoh njerëzit dhe familjet ku po aty ku kam dhuruar gjak janë bërë jashtëzakonisht mirë. Jam falenderues edhe prej vetes edhe prej Zotit Nëse edhe një pikë nga gjaku im s’ka shkuar drejtpërdrejt aty, qëllimi im është arritur dhe (pacienti/ja) është bërë mirë. Pacientët në çdo rast kanë pasur sukses”, thotë për Katror Gërguri.
Sipas organizatave për mbrojtjen e shëndetit, në nga përfitimet që ka dhuruesi i rregullt i gjakut konsiderohet ndikimi lehtësues në sëmundjet e arterieve koronare.Të gjithë personat nga mosha 18-65 që gëzojnë shëndet të plotë mund të dhurojnë gjak të paktën dy herë në vit.
E Fatmiri, përveç se e bën vetë, këtë bujari e humanitet të dhurimit të gjakut e reflektoi jo veç në mobilizim me kolegët e tij të punës në Korporatën Energjetike të Kosovës (KEK), por edhe te familjarët.
“Me vëllain pothuajse jemi në gjeneratë, është nënkolonel i FSK-së dhe është dhurues i rregullt i gjakut. Faleminderit prej fëmijëve edhe ata na kanë trashëgua dhe unë e tre fëmijët e tjerë japim gjak, vajza e madhe edhe dy djemtë. Vajzën e vogël e kemi në prag edhe ajo sigurisht fillon me dhanë por ende s’i ka 18 vjet. Më pastaj dhurojnë edhe dy vajzat e vëllait, djali tjetër i vëllait, kështu që e kemi traditë të krijuar tashmë në familje”, tregon tutje dhuruesi disa vjeçar i gjakut.
Por, përtej rastit të Fatmirit, ka edhe dhurues të ri, të cilët e nisin një rrugëtim të ri humanitar.
“(Kjo është) hera e parë pas shumë viteve. Më herët, para shumë viteve pata dhuru një herë. Por, pas shumë viteve vendosa edhe unë me fillu me dhuru gjak. Ndoshta pikënisja ka qenë si akt human, për ata njerëz që kanë nevojë në raste të caktuara deri te shpëtimi i jetës apo momenteve të caktuara. Me alpinizëm jemi në një grup, qe 10 vite merrem me hiking. Mendoj që njerëzit që e kanë shëndetin në rregull e mirë, duhet me dhuru gjak se edhe për shëndetin e tyre thonë që është mirë. Kështu që jam shumë e lumtur, po ndjehem mirë që dhurova edhe do të vazhdoj tash e tutje”, shprehet Bunjaku.
Përafërsisht Kosova brenda një viti ka nevojë për rreth 30 mijë doza të gjakut. Fatmirësisht tashmë ka një rritje prej 2% të dhuruesve për dallim nga vitete pandemike. Por, krye udhëheqësja e Departamentit të dhurimit të gjakut, Safete Maliqi Çormemeti thotë se nevojat ende vazhdojnë të jenë të mëdha.
“Unë i ftoj ata që nuk e kanë dhuruar deri më tani gjakun e tyre të vijnë në qendrën tonë. Është procedurë që nuk zgjat shumë dhe pas dhurimit nuk ka komplikime. I ndihmon sepse është mënyra më e mirë për të parë shëndetin e tyre, i ndihmon të tjerët, zhvillohet humanizmi përbrenda tyre. Dhuruesi i mirëfilltë vullnetar është ai i cili vjen një herë dhe vazhdon për të qenë dhurues për ta promovuar dhurimin aty ku jeton, në familje e në rreth”, tha Safete Maliqi Çormemeti.
Laboranti në Institutin Kombëtar të Shëndetit publik, Vehbi Tahiri i cili deri më tani ka dhuruar mbi 40 herë gjak, ka një mesazh edhe si personel shëndetësor.
“Përafërsisht çdo tre deri në katër muaj jepi gjak vullnetarisht dhe e di që është një lëng i çmuar për ata që kanë nevojë. Është mirë na që e kemi shëndetin, të japim për ata të cilët kanë nevojë, edhe ua përmirësojmë shëndetin e tyre por në raste specifike edhe e shpëtojmë jetën e tyre se varet në çfarë situate duhet gjaku. Prandaj unë në cilësinë e punëtorit shëndetësor i ftoj të gjithë ata që kanë shëndet dhe kanë vullnet të mirë të dhurojnë gjak sepse dhurimi i gjakut është një akt shumë human por njëkohësisht edhe shumë veti e mirë e cila shpëton jetë”, shprehet Tahiri.
Kur dikush dhuron gjak, ai kontribuon drejtpërdrejt në mirëqenien e komunitetit duke mundësuar shpëtimin e jetëve, duke siguruar furnizim të vazhdueshëm me gjak dhe mbështetur spitalet, duke promovuar unitetin dhe solidaritetin dhe duke rritur vetëdijen për veprën humane.
E motoja e sivjetme e dhurimit të gjakut është “Dhuro gjak, dhuro jetë, dhuro plazmën, dhuro shpesh”. Ndërkaq mënyrat e dhurimit të gjakut janë përmes vizitës fizike në Qendrën Kombëtare të Kosovës për Transfuzion të Gjakut apo organizimin grupor në koordinim me institucionin në hapësira të tjera.
Sipas Kryqit të Kuq Shqiptar, në 46 vende të Evropës, dhurimi vullnetar e falas i gjakut është raportuar si një nga burimet kryesore për furnizimin me gjak të sigurt për transfuzion. Mbështetur në raportin e fundit të Organizatës Botërore të Shëndetit të rajonit të Evropës, numri i dhuruesve varion nga më pak se 4.5 në 1000 banorë deri në 45 e më shumë në 1000 banorë. /Katror.info
Edicionin #13 të plotë e gjeni KËTU 🙂
Kliko këtu dhe bonja Follow/pëlqeje Katror.info për me pa veç Lajme të Mira 🙂
Përgatiti:
