Për herë të parë në histori, Hani i Elezit është kthyer në skenë të një festivali ndërkombëtar që bashkon artin, kujtesën dhe kulturën – CrossRoadsFest 2025.
Nga data 18 deri më 20 korrik, ky qytet kufitar po shndërrohet në një udhëkryq krijimtarie, ku performanca artistike nga vendi e bota takohen me natyrën, historinë dhe komunitetin lokal, raporton Katror.info.
Të shtunën, dita fillon me aktivitetin simbolik “Hiking i Kujtesës”, një ecje malore përmes peizazhit të Hanit të Elezit, që ndërthur natyrën me kujtesën kolektive.
Mundesh me e lexu edhe…
Gjatë ditës, vazhdojnë punëtoritë kreative për të gjitha moshat, përfshirë “Green Path” të udhëhequr nga Bedri Bushi dhe Agron Qajani, që fokusohen në qëndrueshmëri dhe edukim mjedisor.
Artistë të ftuar si Brianda Carreras dhe Meli Qena po sjellin përvojë dhe thellësi në punëtori për të rinj.
Në mbrëmje, zona industriale e Sharrcem do të transformohet në një hapësirë magjike me instalacione drite dhe performanca audiovizuale nga Florian Çanga dhe Alzan Gashi.
Muzika live nga Edona Reshitaj dhe Florian Çanga do të kulojnë këtë itë të mbushur me energji kulturore dhe bashkëjetesë.
Dita 3: Mendim, trashëgimi dhe një mbyllje emocionuese
Dita e fundit e CrossRoadsFest 2025 sjell reflektim dhe krijimtari, duke nisur me tryezën shkencore “Udhëkryq i Kujtesës”, ku ekspertë, artistë dhe pjesëmarrës debatojnë mbi rolin e kujtesës në shoqëri.
Paralelisht, zhvillohen aktivitete edukative dhe kreative për fëmijë dhe të rinj, të përshtatura për të gjithë ata që duan të mësojnë përmes artit.
Në mbrëmje, poetja Ilire Zajmi udhëheq një mbrëmje poetike nën dritën e instalacioneve të Florian Çangës, përpara se festivali të përmbyllet me një koncert madhështor nga Nezafete Shala & Melodia e Vjetër, përkrah Njazi Shalës, Asim Shalës dhe Ramadan Zeqirit – duke nderuar muzikën tradicionale shqiptare në një atmosferë intime dhe të paharrueshme.
Pse Hani i Elezit?
Ky qytet në jug të Kosovës, dikur vetëm një pikëkalim kufitar, po shndërrohet në një pikë takimi kulturor. Organizatorët nga Shoqata e Gruas “DUA” kanë zgjedhur Hanin e Elezit për historinë e tij si udhëkryq kulturash dhe komunitetesh, duke i dhënë kështu një dimension të ri përmes artit dhe bashkëjetesës kulturore.
Katror Media është partner medial i festivalit, ndërsa festivali ka marrë mbështetje të gjerë nga komuniteti dhe emra të njohur vendorë e ndërkombëtarë.
