Ekspertja shqiptare e sigurisë kibernetike, Dredhza Braina, është përzgjedhur si finaliste në listën e ngushtë për çmimin prestigjioz ndërkombëtar Cybersecurity Woman of the Year Awards 2025, shkruan Katror.info.
Lajmi u bë i ditur nga vetë Braina përmes një postimi emocionues në rrjetin social Facebook, ku ajo shprehu mirënjohjen dhe krenarinë për këtë arritje të jashtëzakonshme.
“Ende duke e përjetuar emocionin… por po, ndodhi!”, shkruan Braina, duke e cilësuar këtë moment si një vlerësim të pasionit, përkushtimit dhe qëllimit të saj të përditshëm në fushën e sigurisë kibernetike.
E nominuar nga United Cybersecurity Alliance, Braina falënderoi në veçanti Carmen Marsh dhe ekipin organizator për këtë njohje, ndërsa nënvizoi se kjo përfaqësim është edhe një zë i fuqishëm për gratë shqiptare në teknologji, në një skenë gjithnjë e më globale.
“Siguria kibernetike nuk është thjesht punë për mua, është pasion, mision dhe mënyra ime për të kontribuar në një botë më të sigurtë dixhitale”, theksoi ajo.
Ky është një tjetër sukses për profesionistët shqiptarë në fushën e teknologjisë, dhe një motivim për të gjitha vajzat që synojnë të ndjekin rrugën e inovacionit dhe sigurisë digjitale.
Ceremonia e ndarjes së çmimeve pritet të mbahet më vonë këtë vit, ku finalistet nga e gjithë bota do të njihen për kontributin e tyre në përmirësimin dhe forcimin e sigurisë kibernetike globale./Katror.info
