Në natën e dytë të koncertit të saj madhështor në Wembley, Dua Lipa ngriti atmosferën në një tjetër nivel duke prezantuar Charli XCX si të ftuar speciale, në një duet të papritur që elektrizoi 70,000 të pranishmit.
Dyshja interpretoi këngën “360”, duke sjellë energji të fuqishme në skenë dhe një moment që fansat nuk do ta harrojnë lehtë.
Gjatë koncertit, këngëtarja britaniko-shqiptare nuk kurseu as emocionet, as stilin. Ajo u shfaq me një seri veshjesh spektakolare – nga fustani transparent blu me të çarë të theksuar, deri te çizmet me shkëlqim dhe veshjet e zbukuruara me dantella – ndërsa interpretoi një repertor të pasur me hitet që e bënë të famshme: “Levitating”, “Training Season”, “Hotter Than Hell” dhe “New Rules”.
Mundesh me e lexu edhe…
Një ditë më parë, Dua kishte surprizuar publikun me prezencën e Jamiroquai në skenë, ndërsa këtë herë, vendin e zuri Charli XCX, duke treguar sërish se çdo natë e këtij turneu është unike.
Vetëm me tre albume, Dua po dominon stadiume dhe po e forcon pozitën si një prej artisteve më me ndikim të dekadës.
Nga emocionet e para kur performonte për 350 veta në Londër, në një Wembley të mbushur plot – ajo tha me emocion: “Është surreale të jem këtu. Kanë kaluar 10 vjet nga ajo natë”.
Koncertet e saj në Londër u shndërruan në festë të muzikës pop moderne, ndërsa vetë Dua premton se do të jetë më afër publikut, duke përfshirë lëvizje nga skena drejt turmës për të ruajtur ndjesinë intime të performancës, pavarësisht përmasave të mëdha.
Një tjetër moment historik për karrierën e saj – dhe për fansat, një natë që do të kujtohet gjatë./Telegrafi./Katror.info
