Këngëtarja me famë botërore Dua Lipa bën rikthimin e madh e të shumëpritur në Prishtinë, konfirmon performancën në Sunny Hil Festival këtë verë.
Lajmi është bërë i ditur sot nga organizatorët e festivalit, të cilët konfirmuan se artistja shqiptare me karrierë ndërkombëtare do të rikthehet në skenën ku nisi gjithçka.
“Prishtinë, a je gati? Ikona globale e muzikës pop, Dua Lipa po vjen në Sunny Hill Festival 2025 – për një performancë të paharrueshme në skenën kryesore të festivalit më të madh të muzikës në rajon. Si pjesë e turneut të saj botëror “Radical Optimism”, Dua do të ndalojë edhe në Prishtinë. Kryeqyteti do të jetë destinacioni i vetëm në Evropën Juglindore ku artistja me famë botërore do të perfomojë,” kanë njoftuar organizatorët.
“Pas rekordeve të njëpasnjëshme në skenat më prestigjioze, nga Glastonbury tek Royal Albert Hall, dhe pasi ka mahnitur tashmë publikun në Melbourne, Madrid e gjitha kryeqytetet më të mëdha botërore, Dua Lipa do të sjell hitet dhe energjinë e saj unike në Sunny Hill, që mbahet nga 1 deri më 3 gusht.”
Mundesh me e lexu edhe…
“Prishtinë, ky është momenti! Bëhuni gati për një edicion si asnjëherë më parë të festivalit Sunny Hill, me plot artistë botërorë dhe lokal, emrat e të cilëve do të zbulohen së shpejti,” kanë njoftuar organizatorët e Sunny Hill.
Pëveç Dua Lipës, Festivali ka konfirmuar edhe performancën e PEGGY GOU (DJ Nr.1 në botë në Top 100 DJ të DJ Mag 2023). E njohur për himnin e saj veror “(It Goes Like) Nanana”, Gou pritet të elektrizojë skenën C4.
Një ditë më parë këngëtarja shqiptare me famë ndërkombëtare, Dua Lipa, la të nëkuptohet se po rikthehet me performancë në edicionin e sivjetmë të festivalit Sunny Hill. Lajmin e ka konfirmuar me anë të një postimi të shpërndarë me ndjekësit në Instagram, aty ku numëron 87.4 milionë njerëz.
Në kuadër të turneut dhe vendeve që do të mbajë koncerte ishte edhe Prishtina.
Dua Lipa ka qenë pjesë e Sunny Hill që nga edicioni i parë, duke kontribuar në ndërtimin e identitetit dhe shpirtit të festivalit. Pritet që performanca e saj këtë vit të sjellë emocione të veçanta dhe një energji të jashtëzakonshme për publikun vendas dhe ndërkombëtar.
Sunny Hill Festival është një nga ngjarjet më të mëdha muzikore në rajon, duke sjellë në Prishtinë emra të mëdhenj të muzikës botërore dhe duke promovuar artin dhe kulturën shqiptare në skenën ndërkombëtare.
I themeluar në vitin 2018 nga këngëtarja Dua Lipa dhe babai i saj, Dukagjin Lipa, festivali ka për qëllim promovimin e kulturës dhe muzikës shqiptare, si dhe ofrimin e mundësisë për artistët ndërkombëtarë të performojnë në Kosovë.
Këtë vit festivali do të mbahet nga 1 deri më 3 gusht. Shitjet e biletave “Early Bird” tashmë kanë filluar dhe organizatorët ftojnë të mos e humbasnni mundësinë për të siguruar vendin në festivalin më të madh në rajon. Klikoni këtu për të blerë biletën tuaj: https://ticketing.festtix.co.uk/events/sunny-hill-festival-2025 /Katror.info
Përgatiti:
