Në një ngjarje të organizuar nga Ministria e Industrisë, Ndërmarrësisë dhe Tregtisë të martën, u nënshkruan marrëveshjet për mbështetje financiare për 167 biznese vendase. Ky fond, i cili ka një vlerë totale prej 4.4 milion euro, do të përdoret për blerjen e makinerive prodhuese dhe përpunuese nga ndërmarrjet mikro, të vogla e të mesme.
Sipas Ministrisë të Industrisë, ky investim shënon një rekord të ri, me rezultate konkrete dhe të prekshme në krahasim me mbështetjen maksimale të mëparshme, ku nga 500 mijë euro sa ishte vlera maksimale e kësaj skeme mbështetëse deri në vitin 2021, sot ka arritur shifrën rekorde në mbi 4.4 milionë euro.
Ky rezultat me 167 biznese përfituese të skemës së granteve për blerjen e makinerive, përfshin 90 biznese që përfitojnë për herë të parë.
Mundesh me e lexu edhe...
Në fjalën e saj, Ministrja e Industrisë, Rozeta Hajdari theksoi se ky program është një hap i rëndësishëm për fuqizimin e bizneseve vendore dhe përmirësimin e kapaciteteve të tyre teknologjike, duke i bërë më konkurruese në tregjet e huaja.
Ajo theksoi edhe investimet kapitale në ndërtimin e parqeve industriale dhe teknologjikë dhe inkubatorë të biznesit në shërbim ndaj bizneseve në komuna dhe në akademi, dhe u zotua për përkrahjen e vazhdueshme të ndërmarrjeve fillestare mikro, të vogla dhe të mesme, të cilat janë shtytës kryesor i zhvillimit të qëndrueshëm ekonomik në vendin tonë.
Kjo mbështetje financiare direkte do të ndihmojë ndërmarrjet mikro, të vogla dhe të mesme të 7 nën sektorëve prioritar të industrisë prodhuese, që të zgjerojnë prodhimin e tyre industrial, të krijojnë më shumë vende pune, duke kontribuar kështu në rritjen e eksportit dhe përmirësimin e bilancit tregtar.
Gjatë tre viteve të fundit, 706 ndërmarrjeve mikro, të vogla dhe të mesme u është ofruar mbështetje financiare prej mbi 20 milion eurosh përmes Agjencisë për Investime dhe Përkrahjen e Ndërmarrjeve (KIESA).
Raportet e fundit të Bankës Qendrore të Kosovës tregojnë një rritje ekonomike prej 3.9% për vitin 2024, ndërsa sektori industrial pritet të rritet me 3.6% sipas parashikimeve të Bankës Botërore, Fondit Monetar Ndërkombëtar dhe Organizatës për Bashkëpunim dhe Zhvillim Ekonomik./Katror.info
