Çdo vit, prodhohen rreth 300 milion topa tenisi, shumica e të cilëve përfundojnë në deponi mbeturinash.
Eko-dizajnerja belge, Mathilde Wittock, ka filluar të ripërdorë këta topa në mobilje të personalizuara, duke siguruar që materiali të mos përfundojë në mbeturina.
Wittock dhe ekipi i saj mund të punojnë deri në 1,800 topa në ditë për të krijuar mobilje të ndryshme.
“Përgatitja e një topi tenisi kërkon rreth 24 hapa prodhimi, që zgjasin pesë ditë, por ka një jetë shumë të shkurtër,” thotë Wittock.. “Topat e tenisit kanë një jetëgjatësi të shkurtër dhe kërkojnë rreth 400 vjet për t’u asgjësuar,” shton ajo, shkruan Good News Network, përcjell Katror.
Wittock merr topa tenisi të dhuruar nga klube sportive dhe i përdor ato për të krijuar mobilje të rehatshme dhe estetikisht tërheqëse. Pjesët e mobiljeve mund të kthehen përsëri tek ajo, ku do të riciklohen për përdorime të tjera.
Kjo iniciativë jo vetëm që ndihmon në reduktimin e mbetjeve, por gjithashtu promovon një kulturë të qëndrueshme dhe të vetëdijshme mjedisore, duke inkurajuar të tjerët të mendojnë për mënyra inovative për të ripërdorur materialet që ndryshe do t’i kishin hedhur./Katror.info
