Meta ka nisur procesin e kalimit të adoleshentëve në versione të dedikuara të llogarive në Facebook dhe Messenger, të ndërtuara me funksione shtesë sigurie dhe mjete për mbikëqyrje prindërore.
Kompania ka bërë të ditur se miliona të rinj përdorin tashmë platformat e saj kryesore, përfshirë Instagramin, Facebook-un dhe Messenger-in. Llogaritë me opsione të avancuara për sigurinë e të miturve u prezantuan fillimisht në Instagram një vit më parë. Më pas, në fillim të këtij viti, Meta i vuri në dispozicion këto llogari edhe në Facebook dhe Messenger për përdoruesit në SHBA, Kanada, Mbretërinë e Bashkuar dhe Australi. Tashmë, ky funksionalitet po zgjerohet globalisht.
Të gjithë adoleshentët që përdorin këto platforma do të kalojnë automatikisht në llogaritë e reja, që tashmë janë të detyrueshme për këtë grupmoshë. Për më tepër, përdoruesit e moshës 13 deri në 15 vjeç do të kenë nevojë për aprovimin e prindërve për të modifikuar cilësimet e sigurisë.
Mundesh me e lexu edhe…
Meta deklaron se përdor teknologjinë e inteligjencës artificiale për të identifikuar llogaritë ku ka dyshime për moshën reale të përdoruesit. Llogaritë e reja mundësojnë prindërve të kenë më shumë kontroll mbi aktivitetin e fëmijëve të tyre në platformë, si p.sh. kohëzgjatja e përdorimit apo kontaktet me të cilët ata ndërveprojnë.
Përveç kësaj, këto llogari janë të pajisura me cilësime të përforcuara të privatësisë dhe sigurisë, me qëllim që të kufizojnë ndërveprimet e të miturve me të rritur të panjohur.
Ndërkohë, Instagram ka filluar të zgjerojë një program që synon të ndihmojë shkollat fillore dhe të mesme në SHBA në raportimin më të shpejtë të rasteve të ngacmimit dhe sjelljeve të papërshtatshme. Aktualisht, kjo nismë po zbatohet në bashkëpunim me një grup të caktuar shkollash përmes një programi partneriteti me institucionet arsimore./Katror.info
