Një raport i ri i Organizatës së Ushqimit dhe Bujqësisë së Kombeve të Bashkuara (FAO) tregon se ritmi i shpyllëzimit në botë është ngadalësuar gjatë dekadës së fundit, por pyjet vazhdojnë të përballen me sfida serioze.
Sipas Vlerësimit Global të Burimeve Pyjore 2025 (FRA 2025), pyjet mbulojnë 4.14 miliardë hektarë, që përbën rreth një të tretën e sipërfaqes tokësore të planetit. Megjithëse norma e shpyllëzimit ka rënë në 10.9 milionë hektarë në vit – nga 17.6 milionë në vitet 1990-2000 – presionet mbi ekosistemet pyjore mbeten të mëdha.
Raporti thekson se më shumë se gjysma e pyjeve në botë janë tashmë nën plane afatgjata menaxhimi, ndërsa 20 për qind ndodhen brenda zonave të mbrojtura ligjërisht.
Mundesh me e lexu edhe…
Në Evropë, pyjet mbulojnë 1.04 miliardë hektarë, ose 25 për qind të sipërfaqes pyjore globale, me 92 për qind të tyre që janë pyje natyrale të rigjeneruara. Zona e pyjeve të mbjella është rritur dhe sot përbën rreth 8 për qind të totalit.
Drejtori i Përgjithshëm i FAO-s, QU Dongyu, theksoi se të dhënat e FRA-së janë “vlerësimi më gjithëpërfshirës dhe transparent global për burimet pyjore dhe menaxhimin e tyre”, duke u bërë thirrje vendeve të përdorin këto të dhëna për politika më të qëndrueshme dhe investime në mbrojtjen e pyjeve./Katror.info
