Festivali i Porto Palermos, një ngjarje kulturore e kuruar nga artisti i njohur Olen Cesari, u rikthye këtë vit duke sjellë gjallëri në muret e Kalasë së Ali Pashë Tepelenës. Për dy javë, nga 1 deri më 18 gusht, kjo kala historike u shndërrua në skenën e disa prej artistëve më të njohur shqiptarë dhe të huaj, si Inva Mula, Marsela Çibukaj, Vitmar Basha, Elina Duni, Dren Abazi, Mathew Marston, Lavina Mancusi, Blue Bird Band dhe të tjerë.
Mane Foundation dhe Green Coast, duke vijuar angazhimin e tyre në promovimin e artit dhe kulturës shqiptare, mbështetën Festivalin e Porto Palermos, i cili është cilësuar si “pasaporta e Shqipërisë”. Ky event mbledh së bashku artistët më të njohur për të promovuar Shqipërinë në botë, duke synuar të transmetojë përmes muzikës vlerat shqiptare dhe trashëgiminë e pasur kulturore, shkruan GazetaTema.
Përveç promovimit të kulturës dhe muzikës, këto aktivitete përçuan një mesazh të rëndësishëm për mbrojtjen e mjedisit, një thirrje që organizatorët e përkrahën me angazhim të madh përmes aktiviteteve të tjera që organizojnë dhe mbështesin.
Studentë, pedagogë, organizata, biznese dhe grupe vullnetarësh iu bashkuan me përkushtim fushatës “Të ruajmë detin tonë”, për të rikujtuar se plazhet, pasuritë natyrore, dhe objektet e trashëgimisë historike e kulturore janë përgjegjësi e përbashkët e të gjithëve./Katror.info
