Federata e Futbollit e Kosovës (FFK) organizoi ceremoninë e ndarjes së licencave A për trajnerët që përfunduan me sukses kursin e avancuar për këtë nivel profesional, shkruan Katror.info.
Ndarjen e certifikatave e bëri presidenti i FFK-së, Agim Ademi, i cili u shpreh krenar për progresin e dukshëm në formimin e trajnerëve kosovarë.
Në këtë ngjarje të rëndësishme morën pjesë gjithashtu sekretari i përgjithshëm i FFK-së, Markus Weidner, dhe drejtoresha për edukim, Sanije Krasniqi.
Mundesh me e lexu edhe…
Trajnerët e licencuar ndoqën një program të plotë profesional, i cili përfshiu ligjërata teorike dhe praktike nga ekspertë të njohur ndërkombëtarë. Gjatë këtij kursi, pjesëmarrësit patën mundësinë të përvetësojnë njohuri dhe përvoja të vlefshme nga profesionistë të dëshmuar në fushën e futbollit.
Në fjalën e tij gjatë ceremonisë, presidenti Agim Ademi përgëzoi trajnerët për suksesin e tyre dhe theksoi rëndësinë e kualifikimit profesional për avancimin e futbollit në Kosovë. Ai shprehu bindjen se trajnerët e rinj do të kontribuojnë fuqishëm edhe në skenën ndërkombëtare, duke përfaqësuar denjësisht vendin tonë.
Ndër trajnerët e licencuar, Debatik Curri falënderoi FFK-në për mundësinë e ofruar dhe theksoi angazhimin për të vazhduar më tej në karrierën e tij, duke synuar edhe marrjen e licencës Pro në të ardhmen.
“Besoj se nuk duhet të ndalemi këtu. Duhet të japim kontribut dhe këtë kurs ta gëzojnë edhe të tjerët. Kemi mësuar nga ekspertë të ndryshëm që kanë ligjëruar, kemi marrë përvojat e tyre dhe kemi mësuar profesionalisht. Ne do të bëhemi gati që në të ardhmen ta marrim edhe licencën Pro”, u shpreh ai
Po ashtu, trajnere e licencuar Hava Dakaj shprehu kënaqësinë dhe shpresën që kjo licencë do të jetë hap i rëndësishëm për të ardhmen e saj në futboll.
“Falënderoj Agim Ademin që e mundësoi këtë kurs. Unë pres shumë prej kësaj licence sepse e dua këtë punë dhe dua të kem një të ardhme sa më të mirë. Kur i ke dokumentat siç i kemi tani me këtë licencë, gjithçka mundesh me arritë”, deklaroi ajo.
Kjo ceremoni përbën një përparim të rëndësishëm në zhvillimin e trajnerëve kosovarë dhe në rritjen e standardeve të trajnimit në futbollin vendor. /Katror.info
Përgatiti:
