Presidenti i FIFA-s, Gianni Infantino, njoftoi sot krijimin e Çmimit të Ri për Paqen, që do të jepet çdo vit për individët që kontribuojnë në bashkimin e njerëzve dhe sjellin shpresë për brezat e ardhshëm. Njoftimi u bë përpara pjesëmarrjes së tij në Forumin Amerikan të Biznesit në Miami, ku do të jetë gjithashtu edhe Presidenti i SHBA-së, Donald Trump.
“Futbolli punon për paqen dhe, në emër të të gjithë komunitetit të futbollit, Çmimi për Paqen i FIFA-s do të njohë përpjekjet e jashtëzakonshme të individëve që bashkojnë njerëzit dhe u sjellin shpresë brezave të ardhshëm”, deklaroi Infantino.
Ceremonia e parë e ndarjes së çmimit do të mbahet më 5 dhjetor në Uashington, gjatë shortit për Kupën e Botës 2026. Media amerikane kanë nisur spekulimet se fituesi i parë mund të jetë Presidenti Trump, me të cilin Infantino ka një miqësi të njohur personale, dhe i cili pritet të marrë pjesë në këtë ngjarje./RTV21/Katror.info
