Filmi i metrazhit të shkurtër “Mua besoj më shpëtoi portreti” i Alban Mujës do të shfaqet në kuadër të Festivalit të Filmit “Vienna Shorts” në Vjenë të Austrisë dhe në Festivalin e Filmit të Shkurtër (Kurzfilm Festival) në Hamburg të Gjermanisë.
Produksioni i filmit “038STUDIO” ka njoftuar se filmi “Mua besoj më shpëtoi portreti” (I Believe the Portrait Saved Me), pas Berlinales dhe premierës holandeze në “GoShorts” do të prezantohet në Festivalin “Vienna Shorts” që mbahet nga 27 maj deri më 1 qershor 2025, në programin tematik “Kur do të mësojnë ndonjëherë”, dhe nga 3 deri më 8 qershor 2025 në “Kurzfilm Festival” në Hamburg, ku do të garojë në kategorinë ndërkombëtare, përcjell Kallxo.com.
“Ky film 10-minutësh trajton tema të mbijetesës, qëndresës dhe fuqisë transformuese të artit gjatë luftës së Kosovës. Filmi ofron një eksplorim të fuqishëm të krijimtarisë si një mjet qëndrueshmërie përballë sfidave të jashtëzakonshme”- thuhet në njoftim.
Piktori Skender Muja njëzetepesë vjet pas rrëmbimit të tij gjatë luftës rrëfen historinë e mbijetesës gjatë kohës sa ishte mbajtur nga forcat serbe gjatë luftës në një shkollë që ishte shndërruar në një vend ndalimi.
Mundesh me e lexu edhe…
Ky film është prodhuar nga “038STUDIO” në Prishtinë, në bashkëprodhim me “AsfaltFilms” nga Amsterdami (Holandë), ndërsa është mbështetur nga Qendra Kinematografike e Kosovës. /Katror.info
Përgatiti:
