Qendra Kryesore e Mjekësisë Familjare (QKMF) në Prishtinë ka njoftuar se të mërkurën do të fillojë vaksinimi kundër gripit sezonal.
Lajmin e ka bërë të ditur QKMF-ja përmes një komunikate për media në rrjetin social ‘Facebook’.
“Ju njoftojmë se nga data 01.10.2025 fillon vaksinimi kundër gripit sezonal. Ju mund ta merrni këtë shërbim në QMF-të më të afërta që I keni ku ka njësi të vaksinimit”.
Mundesh me e lexu edhe...
Në njoftim, thuhet se qytetarët për t’u vaksinuar duhet të posedojnë letërnjoftimin ose çertifikaten e lindjes edhe për fëmijët e vegjël, për shkak të regjistrimit të të dhënave në sistem.
Në fillim të vitit 2025, Kosova ishte kapluar me raste të përhapjes së gripit sezonal, ku rreth 65 mijë qytetarë të Kosovës ishin vaksinuar kundër gripit sezonal.
Simptomat kryesore të gripi sezonal janë: kollitja, teshtitja, dhimbje fyti, ethe, dhimbje koke, dhimbje të muskujve, ndjenjë rraskapitjeje, dhe gjithashtu, karakterizohet nga prania e temperaturës së lartë që zgjat 3-4 ditë (38-40°C)
Vaksinimi kundër gripit sezonal bëhet për të parandaluar përhapjen e sëmundjeve të frymëmarrjes gjatë sezonit të dimrit, duke rritur mbrojtjen e komunitetit, sidomos për grupet më të rrezikuara si fëmijët, të moshuarit dhe personat me sëmundje kronike./Albanian Post/Katror.info
