Filmi i shkurtër dokumentar “Mua besoj më shpëtoi portreti” (I Believe the Portrait Saved Me), me regji të artistit dhe kineastit kosovar Alban Muja, po vazhdon me sukses rrugëtimin e tij ndërkombëtar, duke u përzgjedhur në dy festivale prestigjioze evropiane, shkruan Katror.info.
Pas premierës botërore në seksionin Forum Expanded të Festivalit Ndërkombëtar të Filmit Berlinale në shkurt 2025 , filmi do të shfaqet në Vienna Shorts (27 maj – 1 qershor 2025), ku është përfshirë në programin tematik “Kur do të mësojnë ndonjëherë?”. Projekcioni i filmit në këtë festival do të mbahet më 31 maj, në orën 18:30, në Kino METRO.
Më pas, filmi do të vazhdojë rrugëtimin e tij në Gjermani, në kuadër të Kurzfilm Festival Hamburg (3 – 8 qershor 2025), ku do të konkurrojë në Garën Ndërkombëtare. Shfaqjet në këtë festival janë planifikuar më 5 qershor në orën 21:39 në Kino ZEISE 2, dhe më 6 qershor në orën 16:30 në Kino B-MOVIE.
Mundesh me e lexu edhe…
Filmi, i cili zgjat 10 minuta, rrëfen një ngjarje të vërtetë nga Lufta e Kosovës në vitin 1999. Piktori Skënder Muja, babai i regjisorit, tregon historinë e tij të mbijetesës kur, i ndaluar nga forcat serbe në një shkollë të kthyer në kamp ndalimi, iu kërkua të vizatonte portretin e komandantit serb. Me kërcënimin se jeta e tij varej nga cilësia e portretit, Muja arriti të shpëtojë falë aftësive të tij artistike .
Producent i filmit është Edon Rizvanolli, me kinematografi nga Samir Karahoda dhe montazh nga Enis Saraçi. Filmi është prodhuar nga 038STUDIO në Prishtinë, në bashkëprodhim me AsfaltFilms nga Amsterdami, dhe është mbështetur nga Qendra Kinematografike e Kosovës./Katror.info
Përgatiti:
