Kosova shënoi një fitore të jashtëzakonshme 2-0 në udhëtim ndaj Sllovenisë në kuadër të kualifikimeve për Kupën e Botës 2026, duke siguruar për herë të parë në histori një vend në fazën play-off. Fitorja erdhi me një paraqitje të fuqishme, e cila e ngriti Kosovën në vendin e dytë të Grupit B me 10 pikë.
Goli i parë u realizua që në minutën e 6-të, kur Fisnik Asllani u gjend i vetëm përballë portierit Jan Oblak pas një topi të saktë nga Mërgim Vojvoda, duke shënuar me qetësi. Më vonë, në minutën e 64-të, presioni i Kosovës çoi në autogolin e Zan Karnicnik, duke dyfishuar epërsinë.
Ylli i Dardanëve, pas ndeshjes, ka treguar emocionet që e mbushën pas këtij momenti të veçantë.
Mundesh me e lexu edhe...
“Edhe po të ëndërroja nuk do ta mendoja kështu. Kështu që jam shumë, shumë i lumtur. Besoj që më mirë nuk ka mundur të shkonte për ne. Është ndjenjë e jashtëzakonshme. Besoj që ky gol na ka ndihmuar të hyjmë sa më mirë në lojë. Kështu që ndihem shumë, shumë krenar për golin sot”, ka thënë Asllani.
“Atmosfera ka qenë shumë e mirë. Besoj që të gjithë lojtarët, të gjithë shqiptarët që kanë qenë sot në stadium, janë ndier shumë krenar dhe na ka ndihmuar atmosfera të bëjmë lojë të mirë sot”, deklaroi Asllani për faqen zyrtare të FFK-së pas ndeshjes.
Sllovenia u godit edhe më rëndë në pjesën e dytë, kur zëvendësuesi Petar Stojanović mori dy kartonë të verdhë brenda pak minutash dhe u përjashtua nga loja, duke e lënë ekipin vendas me dhjetë lojtarë. Me epërsinë numerike dhe ritmin e lojës, Kosova e menaxhoi me siguri fundin e ndeshjes për të vulosur triumfin historik./Katror.info
Përgatiti:
