Të renditur njëri pas tjetrit është realizuar fotografia e njohur si familjare në Samitin e Komunitetit Politik Europian në Tiranë.
Në qendër të fotos janë kryeministri i Shqipërisë, Edi Rama, ndërsa në dy krahët e tij qëndrojnë presidenti francez Emanuel Macron dhe presidenti i Këshillit Europian, Antonio Costa.
Në rreshtin e parë janë pozicionuar me radhë: shefi i NATO-s Mark Rutte, presidentja e Komisionit Europian Ursula von der Leyen, kryeministri britanik Keir Starmer dhe presidenti ukrainas Volodymyr Zelenskyy. Në radhë të parë janë edhe kryeministrja daneze Mette Frederiksen, kryeministrja italiane Giorgia Meloni, presidenti turk Rexhep Tayyp Erdogan, kancelari gjerman Fridrich Merz dhe kryeministri hungarez Viktor Orban.
Mundesh me e lexu edhe…
Presidentja Vjosa Osmani është radhitur në rreshtin e dytë pas kryeministrit Starmer.
Tirana është mikpritësja e Samitit të gjashtë të Komunitetit Politik Europian, ku liderë, kryetarë shtetesh dhe qeverish nga 47 vende europiane, së bashku me drejtuesit e institucioneve kryesore europiane dhe ndërkombëtare do të mblidhen në Sheshin “Skënderbeu” për të diskutuar çështjet më të rëndësishme për kontinentin.
Ngjarja bashkë-organizohet nga presidenti i Këshillit Europian, António Costa, dhe Kryeministri i Shqipërisë, Edi Rama. Dy ditë më parë, Costa qëndroi në Kosovë, ku zhvilloi takime me presidenten e Kosovës, Vjosa Osmani dhe kryeministrin në detyrë, Albin Kurti.
Nën moton “Europa e re në një botë të re: unitet – bashkëpunim – veprim i përbashkët”, Samiti synon të forcojë dialogun dhe bashkëpunimin ndërmjet vendeve evropiane për siguri, demokraci dhe zhvillim të qëndrueshëm.
Në këtë takim të nivelit të lartë, sipas njoftimit të Këshilllit Europian, Bashkimi Europian përfaqësohet edhe nga presidentja e Komisionit Europian, Ursula von der Leyen, dhe Përfaqësuesja e Lartë për Punë të Jashtme, Kaja Kallas.
Pas një dreke zyrtare, liderët do ndahen në tryeza tematike dhe më pas në takime bilaterale.
Samiti do të përmbyllet me një sesion plenar dhe një konferencë të përbashkët për shtyp mes kryeministrit Rama dhe kryeministrit të Danimarkës – vendit mikpritës të samitit të ardhshëm në vjeshtë 2025.
Temat kryesore gjatë Samitit janë: siguria europiane dhe mbështetja për Ukrainën, forcimi i mbrojtjes dhe demokracisë, rritja e konkurrueshmërisë përmes inovacionit dhe investimeve, sfida të mobilitetit, përfshirë migrimin dhe lëvizjen e të rinjve.
Diskutimet do të zhvillohen në tri tryeza tematike: sigurimi i Europës dhe forcimi i rezistencës demokratike; një Europë për 600 milionë qytetarë: inovacion dhe siguri ekonomike dhe e treta: Europë e hapur me kufij të sigurt: sfidat e mobilitetit dhe fuqizimi i të rinjve
Përveç 27 vendeve anëtare të BE-së, në samit do të marrin pjesë edhe vende të Ballkanit Perëndimor, përfshirë Shqipërinë si vend mikpritës, Kosovën, Serbinë, Malin e Zi, Maqedoninë e Veriut dhe Bosnjë-Hercegovinën, si dhe liderë nga Mbretëria e Bashkuar, Ukraina, Turqia dhe shtete të tjera europiane. Të ftuar janë edhe sekretarët e përgjithshëm të NATO-s, Këshillit të Europës dhe OSBE-së./Kallxo.com
