Në zemër të Prishtinës, te Parku i Shkallëve të Arbërisë, qytetarët po mirëpresin një instalacion të veçantë artistik me rastin e Ditës së Evropës. Skulptura interaktive “From HERE to ANYWHERE”, nga artisti i njohur Driton Selmani, është më shumë se një vepër arti – është një ftesë për të përjetuar dhe për të reflektuar mbi vlerat evropiane, raporton Katror.info.
Ky instalacion u realizua nga Lëvizja FOL dhe Instituti i Prishtinës për Studime Politike (PIPS), me mbështetje nga programi MATRA i Ambasadës së Holandës në Kosovë dhe me leje nga Drejtoria e Parqeve në Kryeqytet.
Drejtoresha e Kulturës në Kryeqytet, Sibel Halimi, theksoi rëndësinë e kësaj vepre duke e quajtur atë “një ftesë për të imagjinuar një të ardhme ku kufijtë nuk janë pengesë, por pikënisje.”
Mundesh me e lexu edhe…
Sipas saj: “Nga këtu drejt kudo” mishëron idealin e lirisë, të lëvizjes, të mendimit dhe të shprehjes, si themel i një rruge që na bashkon, na ndërlidh dhe na jep kuptim si individë e si komunitet.”
Ajo shprehu mirënjohje për organizatat dhe institucionet që mundësuan këtë projekt, duke e cilësuar veprën si një shembull të qartë se si “drita e Evropës ndriçon më fort kur liria bëhet art.”
Ambasada e Holandës tha për instalacionin: “From HERE to EVERYWHERE… na fton të lëvizim, të ndalemi dhe të përjetojmë jo vetëm si vëzhgues, por si pjesëmarrës. Lëkundësja simbolizon hapjen, optimizmin dhe lidhjen. Nuk është vetëm një vepër arti në një vend të veçantë, por një ftesë për të jetuar vlerat që na bashkojnë si evropianë: uniteti, paqja dhe solidariteti.”
Përmes kësaj skulpture të veçantë, qyteti i Prishtinës i bashkohet festimeve të Ditës së Evropës, duke përçuar një mesazh të qartë: Evropa është më shumë sesa një destinacion – është një frymë bashkimi dhe bashkëpunimi./Katror.info
