Për Eliot Bujupin nuk ishte ditë e zakonshme e shtuna e 21 gushtit. 18-vjeçari kishte pranuar një telefonatë nga një numër privat. Kishte mbetur për disa sekonda pa fjalë, kur kuptoi se kush e telefononte.
Ishte përzgjedhësi i Kosovës në futboll, Franco Foda, që ia dha lajmin se do ta përfshinte në listë për dy ndeshjet e para të edicionit të ri të Ligës së Kombeve. Gëzimin që ia solli biseda me trajnerin gjerman të Kosovës, Bujupi vështir e përshkruan me fjalë.
“Një telefonatë e papritur që më solli shumë emocione të bukura. Isha shumë i emocionuar dhe shumë i lumtur”, ka thënë Bujupi të dielën për KOHËN.
“Ndihem realisht shumë i emocionuar. Për mua dhe gjithë familjen është një ëndërr e realizuar”.
Selektori Foda publikoi të premten listën e lojtarëve të Kosovës për ndeshjet kundër Rumanisë dhe Qipros. Ndaj Rumanisë, Kosova luan të premten në stadiumin “Fadil Vokrri” në Prishtinë, kurse tri ditë më pas luan në udhëtim ndaj Qipros.
Ftesa që Foda ia bëri Bujupit u vlerësua befasi. Befasi e quan edhe futbollisti i talentuar.
“Kaq shpejt nuk e kam pritur, megjithatë faleminderit nga zemra Federatës së Futbollit të Kosovës”, ka theksuar Bujupi, i cili shkëlqeu me fanellën e Kosovës U19.
Eliot Bujupi ka luajtur shtatë ndeshje për Gjermaninë U17 dhe tri ndeshje për Gjermaninë U16 para se në nëntor të vitit 2023 të paraqitej për herë të parë me fanellën e Kosovës.
Me Kosovën U19 katër gola në pesë ndeshje.
Golin e fundi e realizoi më 23 mars kundër Spanjës U19. Ai shënoi supergol nga gjuajtja e lirë gjatë raundit elitar të kualifikimeve për “Euro 2024”.
Për ekipin U19 të Stuttgartit, Bujupi nga janari ka shënuar plot 23 gola. Të fundit e shënoi ndaj Wolfsburgut U19 për Kupë të Gjermanisë për grumposhën e 19-vjeçarëve.
“I kam shënuar 23 gola. Uroj ta kem shëndetin dhe të ndihmoj Kosovën dhe ekipin tim me gola. Për mua është viti më i suksesshëm deri tash. Me ekipin U19 të Stuttgartit këtë vit do të paraqitem në Ligën e Kampionëve. Kundër Real Madridit”, ka treguar Bujupi.
I gëzuar për përfshirjen e Bujupit në ekipin A të Kosovës është edhe trajneri i ekipit U19, Adil Maliqi. Maliqi ishte i pari që ia dha rastin Bujupit të luajë për Kosovën. Ai thotë se pa dëshirën e Bujupit, paraqitja për Kosovën do të ishte e pamundur.
Sulmuesi i talentuar u lind në Boeblingen të Gjermanisë, ndërsa me futboll nisi të merrej nga mosha 7-vjeçare në shkollën e futbollit të VfL Sindelfingen. Luajti edhe për të rinjtë e Stuttgarter Kickers para se në vitin 2021 t’i bashkohej ekipit U17 të Stuttgartit. Në vitin 2023 u gradua në ekipin U19 të Stuttgartit.
Përgatiti:
