Të dhënat e deritanishme të ASK-së kanë treguar se numri i banorëve rezidentë të Fushë-Kosovës sivjet ka shënuar rritje prej afro 30 mijë banorësh, duke arritur në rreth 60.000 prej 34.827 sa kanë qenë në vitin 2011. Derisa kanë mbetur edhe dy ditë deri në përfundimin e afatit për regjistrimin e popullsisë, nënkryetari i Komunës së Fushë-Kosovës, Besnik Osmani, ka thënë se këto statistika kanë qenë të pritshme
Numri i banorëve rezidentë në komunën e Fushë-Kosovës, bazuar në të dhënat e deritanishme të Agjencisë së Statistikave të Kosovës (ASK), sivjet ka shënuar rritje prej afro 30 mijë banorësh, duke arritur në rreth 60.000 prej 34.827 sa kanë qenë në vitin 2011.
Derisa kanë mbetur edhe dy ditë deri në përfundimin e afatit për regjistrimin e popullsisë, nënkryetari i Komunës së Fushë-Kosovës, Besnik Osmani, ka thënë se këto statistika kanë qenë të pritshme, shkruan Koha.net.
Mundesh me e lexu edhe…
Osmani ka bërë të ditur se gjysma e këtij numri të qytetarëve janë vendosur në Fushë-Kosovë nga pothuajse të gjitha qytetet e Kosovës si edhe nga Presheva, Medvegja e Bujanoci.
“E vërteta është që komuna e Fushë-Kosovës ka një shtim jo natyror. Nuk vijnë vetëm nga lindjet por edhe nga procesi i migrimit, që qytetarë të ndryshëm vendosën të jetojnë në Fushë-Kosovës për nevojat dhe qëllimet e tyre. Ndoshta nuk do ta quaja mbipopullim por është një qytet, një komunë e cila vazhdimisht po rritet. Për ne nuk është befasi ky numër i qytetarëve. Kemi pasur informacion edhe më herët, qoftë nga faturat e tatimit në pronë, qoftë nga faturat e shërbimeve që ne i ofrojmë për grumbullimin e mbeturinave dhe përafërsisht e kemi ditur se ky është numri i qytetarëve që pritet që do të regjistrohen në komunën tonë”, ka thënë ai.
E kjo rritje e popullsisë, Osmani ka thënë se do të ketë rol të rëndësishëm edhe në planifikimin strategjik.
“Tani kjo statistikë është shumë e rëndësishëm për arsye se ne jemi duke e bërë planin zhvillimor për dhjetëvjeçarin e ardhshëm dhe kjo neve do të na mundësojë faktikisht që t’i atribuojmë edhe të gjitha planifikimet e nevojshme t’i bëjmë mbi bazë të parametrave që bazohen në bazë të numrit të qytetarëve”, ka thënë nënkryetari i Komunës.
Ai ka përmendur disa faktorë që kanë ndikuar në rritjen e popullsisë, duke i numëruar në këtë mes pozitën strategjike të Fushë-Kosovës në raport me kryeqytetin dhe komunat e tjera.
“Lidhet me aeroportin dhe stacionin hekurudhor, edhe me pjesët e zhvillimit. Por ne mendojmë se faktori kryesor që ka ndikuar është, të themi, niveli i shërbimeve që regjistron komuna, lehtësirat që ofron komuna edhe për qytetarët dhe bizneset, sepse duke qenë bashkëpunues me sektorin e bizneseve dhe sektorin ekonomik kanë ndodhur shumë investime. Janë hapur shumë biznese të reja, janë hapur shumë vende të reja të punës. Pjesa tjetër ka të bëjë me vetë faktin që në sektorin e ndërtimit ka ndjekur procedura dhe standarde që parashihen me ligj dhe të gjitha ndërtesat, objektet e reja, janë objekte që janë bërë me leje, janë pranuar, janë bërë pranimet teknike, qytetarët kanë mundur t’i vendosin emrat e tyre, t’i bëjnë nëse kanë nevojë edhe për nevojat e hipotekës, pra, në banka për financimin e aktiviteteve të tyre familjare dhe për investimet që i kanë në familje”, ka thënë Osmani.
Por në ASK kanë thënë se rritja e numrit të banorëve në Fushë-Kosovë është rezultat i saktësisë së regjistrimit të të dhënave.
“Ka një rritje të numrit të popullsisë në Fushë-Kosovë dhe kjo për shkak të cilësisë së të dhënave që lidhen me teknologjinë informative. Është evidente që komuna e Fushë-Kosovës do të ketë rritje të numrit të qytetarëve, arsyeja është se në regjistrimin e kaluar qytetarët kanë shkuar dhe janë regjistruar në vende prej nga vijnë dhe jo në Fushë-Kosovë. Ata janë regjistruar me letërnjoftim ku e kanë pasur vendbanimin e mëhershëm dhe në këtë regjistrim ne kemi pasur shumë kujdes që qytetarët e Kosovës të regjistrohen në vendbanimin e zakonshëm dhe në vendbanimin e përhershëm, që do të thotë se qytetarët e Fushë-Kosovës janë regjistruar aty ku i kalojnë 12 muaj gjatë vitit”, ka thënë Hazbije Qeriqi, zëdhënëse në ASK.
E demografi Sami Behrami ka theksuar se komuna e Fushë-Kosovës është shndërruar në pol tërheqës për popullsinë, shkaku i afërsisë së saj me kryeqytetin, Prishtinë.
“Meqenëse është shumë afër Prishtinës, ndërsa dallimi ta zëmë, me u pajis me banesë, është shumë më i lirë ose zgjidhja e çështjes së banimit është shumë më e lirë se në Prishtinë dhe kjo është një prej shkaktarëve kryesorë, që popullsia ose njerëzit që emigrojnë prej viseve të tjera të Kosovës po e zgjedhin pikërisht Fushë-Kosovën si vendbanim edhe për punë edhe në Prishtinë. Fushë-Kosova është një paralagje e Prishtinës por që kushtet e banimit janë shumë më të lira sesa në Prishtinë që është një prej faktorëve kryesorë që ka ndikuar që popullsia të koncentrohet në komunën e Fushë-Kosovës”, ka thënë Behrami.
Në Komunën e Fushë-Kosovës kanë bërë të ditur se kanë kërkuar një afat shtesë prej të paktën një jave për finalizimin e procesit të regjistrimit. E në ASK kanë bërë të ditur se planifikojnë që deri të premten të përmbyllin tërë procesin e regjistrimit. /Katror.info
Përgatiti:
