Teleskopi James Webb ka zbuluar dhjetëra galaktika të vogla por shumë të fuqishme, që mund të kenë transformuar universin në epokën e tij më të hershme — brenda një miliard vjetëve pas Big Bengut.
Këto galaktika të vogla, por të mbushura me dritë ultraviolet (UV), mund të kenë ndriçuar “Epokën e Rejonizimit”, periudhë kur mjegulla e gazit hidrogjen neutral që mbulonte universin filloi të shpërndahej.
Shkencëtarët prezantuan zbulimet në konferencën e 246-të të Shoqatës Amerikane të Astronomisë më 11 qershor në Alaskë.
Mundesh me e lexu edhe…
“Këto galaktika të vogla prodhojnë shumë më tepër dritë UV sesa pritej për përmasat e tyre,” tha astrofizikani Isak Wold nga NASA.
Galaktikat u identifikuan përmes efektit të zmadhimit gravitacional në një grumbull galaktikash të njohur si Abell 2744. Ekipi kërkoi praninë e oksigjenit të jonizuar dy herë, një shenjë që drita UV ishte mjaft e fuqishme për të ndryshuar strukturën e atomeve dhe për të ndriçuar mjegullën fillestare të universit.
Në total, u identifikuan 83 galaktika të vogla “shpërthyese”. Për të barazuar masën e yjeve të galaktikës tonë, Rruga e Qumështit, do të duheshin deri në 200,000 prej tyre.
Megjithatë, kombinimi i fuqisë së tyre UV dhe madhësisë së vogël i lejoi dritës së tyre të depërtojë larg në univers. Këto galaktika antike mund të kenë qenë burimi kryesor i “ndriçimit” të universit të hershëm, sipas studiuesve nga NASA./Katror.info
