Për shumë vjet Gazmend Husaj ishte kapiten dhe lider i padiskutueshëm i Shqipërisë. I tillë do të jetë edhe te Kosova. Volejbollisti më i mirë shqiptar të shtunën do të debutojë me fanellën e Kosovës. Kampanjën kualifikuese për Evropianin e vitit 2026 në volejboll Kosova e nis të shtunën kundër Letonisë. Ndeshjen e parë “Dardanët” e zhvillojnë në palestrën “Bashkim Selishta-Petriti” në Gjilan.
Ndeshja ndaj Letonisë për Kosovën do të jetë e para pas një pauze të gjatë, shkruan Koha.net
“I kam diku rreth 15 vjet karrierë jashtë vendit. Erdhi koha dhe mundësia që unë të kthehem për ekipin e Kosovës. Siç dihet, nga viti 2008 unë kam qenë me ekipin kombëtar të Shqipërisë në volejboll. Sigurisht atë kohë Kosova nuk ka qenë e pranuar. Kosova është pranuar në arenën ndërkombëtare në vitin 2017. Posa u pranua, unë bëra kërkesën që të kthehem me ekipin e Kosovës. Tash ka ardhur momenti që unë ta jap kontributin edhe si lojtar, edhe me eksperiencën ndërkombëtare që e kam, te lojtarët e rinj, te klubi ynë këtu dhe shpresoj që ta bëjmë më të mirën, edhe unë personalisht por edhe i gjithë ekipi”, ka thënë Husaj për KOHËN.
Husaj ishte goxha aktiv gjatë stërvitjes të cilën e përcolli nga afër KOHA. Ai vlerëson lart punën dhe lojtarët e Kosovës.
“Kemi pasur rreth 40 ditë stërvitje të përbashkëta me ekipin, që të ambientohemi, të mësohemi me njëri-tjetrin, po ashtu ta rrisim edhe nivelin teknik dhe taktik. Kemi pasur dy ndeshje miqësore në Maqedoni të Veriut që besoj që ka ndikuar pozitivisht në nivelin dhe në komponimin e ekipit. Siç dihet, është bërë viti që ekipi kombëtar nuk është grumbulluar dhe ka qenë e nevojshme që të bëhen këto stërvitje të përbashkëta dhe këto lojë miqësore. Unë shpresoj dhe po besoj që sukseset në të ardhmen nuk do të mungojnë, duke parë edhe lojtarët e rinj dhe dëshirën e madhe që e kanë për të punuar dhe për të shfaqur më të mirën për këtë fanellë”, ka theksuar Husaj.
Kundërshtarja tjetër Kosovës në Grupin G është Sllovakia. Husaj thotë se Kosova është në grup të vështirë me Letoninë dhe Sllovakinë.
“Ekipi është mjaft i mirë, por sigurisht që ne nuk do të dorëzohemi. Ndeshja e dytë është me Sllovakinë jashtë. Sllovakia e ka ndërruar gjeneratën, ka një ekip të ri. Ka një ekip që janë bërë një apo dy vjet që luajnë bashkë. Ka komplet ndryshim të gjeneratës. Po besoj dhe shpresoj në paraqitje të mirë. Nuk mund ta jap një verdikt final se si mund të dalë rezultati, por unë ju them të gjithëve që ne do ta bëjmë maksimumin që të paraqitemi sa më mirë. Pastaj rezultati është në fund”, ka theksuar ai.
Husaj u kthye pas plot 14 edicioneve të kaluara jashtë Kosovës. Fitoi titullin dhe Kupën e Kosovës me Pejën.
Pejani 36-vjeçar ka bërë karrierë në Shqipëri, Maqedoni të Veriut, Zvicër, Bahrajn, Katar, Itali, Turqi, Francë, Greqi, Arabi Saudite dhe së fundi në Kuvajt.
“Dëshira ime e kamotshme ka qenë që të kthehem në një moment dhe të mundohem ta jap maksimumin për klubin e qytetit të Pejës. Me Pejën kam fituar Kupën dhe kampionatin dhe ka qenë diçka, për mendimin tim, për dëshirën time, ka qenë diçka e jashtëzakonshme. Unë si këtu, si jashtë, jam munduar që ta jap maksimumin. Sigurisht mundi dhe dëshira për të shfaqur dhe punuar shpaguhet me rezultate. Jam shumë i kënaqur, sepse për momentin jam këtu dhe isha sezonin e fundit me klubin e volejbollit Peja”, ka thënë Husaj.
Ai vlerëson rritjen që ka bërë volejbolli kosovar. Por thotë se Kosova ende nuk ka kapacitet të prezantohet me ndonjë klub në Ligën e Kampionëve, nivel të cilin Husaj e ka prekur shumë herë.
Por ai ka diçka që nuk e ka arritur e që synon ta bëjë në të ardhmen.
“Dëshira ime për momentin është të kualifikohemi me ekipin kombëtar. Do të ishte diçka që po besoj do të ishte historike. Siç e dini, Kosova jo që nuk është kualifikuar, por nuk kemi fituar asnjëherë asnjë ndeshje në arenën ndërkombëtare. Do të ishte diçka e jashtëzakonshme personalisht për mua dhe sigurisht edhe për klubin në përgjithësi”, thotë Husaj.
Ai insiston se dëshira e tij të paraqitet me Kosovën në ndonjë ngjarje të madhe, është ëndërr e fëmijërisë.
“Sigurisht që do ta bëj maksimumin që të bëhem pjesë e kësaj historie. Do të jetë diçka e jashtëzakonshme. Dëshira më e madhe e imja do të ishte që të kualifikohemi në raundin tjetër”, ka thënë Husaj.
Pos Husajt, nga Shqipëria te Kosova kaluan edhe Adriatik Kajtazi e Bardhyl Hajdaraj. Kajtazi ka nisur punën si trajner. Këta tre volejbollistë kishin vendosur të luanin për Shqipërinë në kohën kur volejbolli kosovar ende nuk ishte i pranuar në asociacionet ndërkombëtare të këtij sporti./Katror.info
Përgatiti:
