Gjenerata Z po i rikthen në modë profesionet që brezi i “millennials” shpesh i kanë nënvlerësuar si të mërzitshme, duke përfshirë kontabilitetin – dhe sipas raportimeve të fundit, ky brez po përfiton të ardhura të majme në këtë fushë.
Sipas një artikulli të Fortune, kontabiliteti ka pasur imazhin e një profesioni monoton, shpesh i lidhur me “llogaritësin” dhe punën në zyrë pa shumë gjallëri. Madje një studim i vitit 2022 e renditi atë si profesionin e dytë më “të mërzitshëm” pas analizës së të dhënave, shkruan independent.co.uk, transmeton Katror.info.
Megjithatë, shifrat flasin ndryshe. Vetëm në pesë vitet e fundit, rreth 340,000 kontabilistë nga brezi i “baby boomers” janë larguar nga tregu i punës për shkak të pensionimit, duke krijuar një boshllëk të madh. Kjo hapësirë po shfrytëzohet nga të rinjtë e Gjeneratës Z, të cilët po futen në këtë profesion që në bankat e universitetit.
Mundesh me e lexu edhe…
Një shembull i qartë është programi IRS Volunteer Income Tax Assistance (VITA), i cili prej mbi 50 vitesh ndihmon tatimpaguesit me të ardhura të ulëta. Në vitin 2024, vetëm studentët e California State University, Northridge arritën të asistojnë mbi 9 mijë qytetarë për të përfituar gati 11 milionë dollarë në rimbursime tatimore dhe 3.6 milionë dollarë në kredi.
“Edhe pse kontabiliteti shpesh shihet si jo tërheqës, kur të rinjtë angazhohen në praktikë dhe shohin ndikimin real, perceptimi ndryshon plotësisht,” tha Rafael Efrat, drejtori i programit VITA.
Përveç motivimit për të ndihmuar komunitetin, Gjenerata Z po tërhiqet edhe nga paga e lartë. Sipas Glassdoor, paga mesatare e një kontabilisti është rreth 93 mijë në vit, ndërsa me përvojë dhe sektor të përshtatshëm mund të shkojë deri në 122 mijë dollarë. Një CPA (kontabilist i certifikuar publik) mund të arrijë pothuajse 200 mijë dollarë në vit.
Nëse deri dje kontabiliteti shihej si një profesion i mërzitshëm, sot Gjenerata Z po e sheh atë si një mundësi të artë për karrierë të qëndrueshme dhe fitime të larta./Katror.info
Burimi: independent.co.uk
Përktheu dhe përshtati: Katror.info
