Artisti Genti Korini do të përfaqësojë Shqipërinë në Bienalen e 61-të Ndërkombëtare të Artit në Venecia, me projektin e tij të titulluar “A Place in the Sun”, një reflektim mbi kujtesën kolektive, ideologjinë dhe identitetin në hapësirën shqiptare post-socialiste.
Lajmin e ka bërë të ditur ministri i Turizmit, Kulturës dhe Sporteve, Blendi Gonxhja, i cili njoftoi se juria ndërkombëtare e përbërë nga Adela Demetja, Katerina Gregos, Blanche de Lestrange, Elian Stefa dhe Arnisa Zeqo zgjodhi projektin e Korinit si më bindësin mes 17 aplikimeve të paraqitura përmes thirrjes së hapur.
Në arsyetimin e saj, juria vlerësoi:
Mundesh me e lexu edhe…
“Projekti spikat për thellësinë e kuadrit konceptual dhe për saktësinë e realizimit vizual. Duke ndërthurur kërkimin arkivor, folklorin dhe imagjinatën, Korini eksploron mënyrën se si kujtesa kolektive dhe ideologjia formësojnë identitetin dhe hapësirën, duke endur lidhje mes së shkuarës shqiptare dhe ndërthurjeve të saj me Bashkimin Sovjetik”.
Juristët e cilësuan projektin si një risjellje krijuese të arkivave pamore lokale, e ndërtuar përmes një këndvështrimi absurdist dhe lindor, me qasjen eksperimentale dhe shumëdimensionale që karakterizon praktikën e Korinit.
Projekti është zhvilluar në bashkëpunim me kuratoren polake Małgorzata Ludwisiak, dhe synon të krijojë një dialog vizual e intelektual me teatrin eksperimental polak.
Ministri Gonxhja uroi artistin për përzgjedhjen, duke theksuar se pavijoni shqiptar në Bienalen e ardhshme “do të ofrojë një perspektivë të veçantë mbi ndërthurjen e kujtesës dhe identitetit në artin bashkëkohor”.
“I uroj Gentit shumë suksese në realizimin e projektit dhe presim me padurim prezantimin e pavijonit të Shqipërisë në Venecia në majin e ardhshëm”, tha Gonxhja.
Bienalja e Artit në Venecia, një nga ngjarjet më prestigjioze të artit bashkëkohor në botë, do të hapë dyert në maj 2026, duke sjellë bashkë artistë nga mbi 80 vende./AP/Katror.info
