Zëvendëskryeministrja dhe ministrja në detyrë për Punët e Jashtme dhe Diasporës, Donika Gërvalla, përfaqësoi Kosovën në takimin ministror të Procesit të Bashkëpunimit të Evropës Juglindore (SEECP), të mbajtur sot në Tiranë.
Sipas njoftimit të ministrisë, Gërvalla theksoi përkushtimin e palëkundur të Kosovës për integrimin euroatlantik dhe progresin e arritur në katër vitet e fundit në fushën ekonomike dhe institucionale, raporton Katror.info.
Ajo veçoi harmonizimin e plotë të politikës së jashtme me atë të BE-së, mbështetjen për Ukrainën, dhe përkushtimin për zbatimin e Agjendës së Reformave 2024–2027.
Mundesh me e lexu edhe…
Ministrja ngriti shqetësimet për veprimet destabilizuese në rajon, duke përmendur sulmin e 24 shtatorit në Banjskë dhe arrestimin e ish-policit Arbnor Spahiu nga autoritetet serbe, si dëshmi të ndërhyrjes së drejtpërdrejtë të Serbisë.
Në përmbyllje, Gërvalla nënvizoi se pa drejtësi, barazi dhe llogaridhënie të ndërsjellë, nuk mund të ketë progres të qëndrueshëm në rajon, duke bërë thirrje për bashkëpunim të ndershëm dhe respekt për parimet evropiane./Katror.info
