Sot ( e premte, 14 qershor) nis festa për futboll-dashësit, Kampionati Evropian Euro 2024 , ku vendi mikpritës Gjermania pret Skocinë. Faza e grupeve do të zgjasë deri më 26 qershor dhe faza e eliminimit do të fillojë më 29 qershor. Finalja do të luhet më 14 korrik në Olympiastadion të Berlinit.
Kjo do të jetë hera e parë që Gjermania organizon turneun evropian që nga bashkimi i saj në 1990. Në vitin 1988 kampionati u mbajt në atë që atëherë ishte Gjermania Perëndimore.
Ndeshjet do të mbahen në dhjetë qytete në të gjithë Gjermaninë – Berlin, Këln, Dortmund, Dusseldorf, Frankfurt, Gelsenkirchen, Hamburg, Leipzig, Mynih dhe Shtutgart.
Në Euro 2024 do të marrin pjesë gjithsej 24 skuadra të ndara në gjashtë grupe, me 51 ndeshje.
Sipas mediumeve ndërkombëtare, Franca, Gjermania, Anglia, Portugalia dhe Spanja pritet të jenë favoritë.
Franca dhe Anglia ishin të pamposhtur gjatë fazës së kualifikimit, Spanja humbi vetëm një ndeshje, ndërsa Portugalia ishte e vetmja skuadër që fitoi të gjitha ndeshjet e tyre gjatë fazës kualifikuese.
E kur jemi te Portugalia, lojtari i saj Christiano Ronaldo, nëse çdo gjë shkon në favor të tij, ai mund t’i thyejë hiq më pak se 12 rekorde dhe ato do të jenë:
Lojtari me më së shumti paraqitje në kampionat; lojtari më i vjetër që ka luajtur në Kampionatin Evropian; lojtari më i vjetër që ka shënuar në Kampionatin Evropian; lojtar me më shumë gola në kampionate të ndryshme evropiane, me më shumë gola në një kampionat të vetëm evropian; Golashënuesi më i vjetër në finalen e Kampionatit Evropian; lojtari me më së shumti gola nga penalltitë në Kampionate Evropiane; lojtari me më së shumti asistime në Kampionatin Evropian; lojtari me më shumë shanse të krijuara në Kampionatin Evropian; lojtari me më së shumti “Këpuca të Arta” të fituara në Kampionatin Evropian; nëse fiton do të ketë Çmimin e “Lojtarit të Ndeshjes” të fituar më së shumti në Kampionatin Evropian dhe lojtari i përzgjedhur më së shumti në ekipin e turneut.
Por, ne natyrshëm, që me fillim të Kampionatit sytë i kemi kah Shqipëria, e cila u kualifikua për herë të dytë në Kampionat Evropian. Shqipëria zhvillon ndeshjen e parë kundër italisë më 15 qershor, e cila pritet të zhvillohet në Signal Iduna Park të Dortmundit me fillim nga ora 21:00.
Ne ju ftojmë të qëndroni me Katrorin për të gjitha të rejat e kampionatit në website tonë katror.info dhe në rrjetet tona sociale! Shikim të këndshëm dhe fitoftë më i miri!/Katror.info