Kryetari i Komunës së Prishtinës, Përparim Rama, ka njoftuar nisjen e një projekti të ri që do të transformojë hapësirat e harruara të kryeqytetit në rezidenca kreative për artistë nga mbarë bota.
Sipas Ramës, qëllimi i këtij projekti është të krijohen vende ku ndërthuren kultura, ide të reja dhe bashkëpunime ndërkombëtare, duke e kthyer Prishtinën në një qendër të gjallë artistike.
“Po nisim një projekt vizionar: transformimin e hapësirave të harruara në rezidenca kreative për artistë nga mbarë bota. Këto hapësira do të kthehen në vende ku takohen kultura, ide të reja dhe bashkëpunime ndërkombëtare,” ka shkruar Rama në platformën Facebook.
Mundesh me e lexu edhe...
Projekti po realizohet në bashkëpunim me artistin me renome ndërkombëtare Sisley Xhafa, i cili është i njohur për veprat e tij konceptuale dhe për promovimin e artit bashkëkohor në hapësira publike.
Sipas Ramës, kjo nismë synon të frymëzojë krijimtarinë dhe të forcojë lidhjet kulturore mes Prishtinës dhe komunitetit artistik ndërkombëtar.
Kush është Sisley Xhafa?
Sislej Xhafa është një artist konceptual nga Peja, i njohur ndërkombëtarisht për veprat që trajtojnë tema si identiteti, migrimi dhe realitetet sociale.
Jeton dhe punon në New York, ndërsa ka ekspozuar në institucione të rëndësishme si Bienalja e Venecias, Tate Modern në Londër dhe MAXXI në Romë.
Me stilin e tij provokues, Xhafa përdor artin si mjet reflektimi mbi lirinë, përkatësinë dhe dinjitetin njerëzor, duke u konsideruar si një nga artistët shqiptarë më të shquar në skenën botërore të artit bashkëkohor./Katror.info
