Premiera e dokumentarit “I arti i Prishtinës”, kushtuar futbollistit të gjeneratës së artë të Prishtinës, Abdyl Bellopoja, ka mbledhur emra të shquar të futbollit kosovar ndër dekada.
Ky dokumentar paraqet karrierën e bujshme të Bellopojës, me rrëfime të bashkëlojtarëve por edhe personaliteteve tjera.
Presidenti i FFK-së z. Agim Ademi foli për rëndësinë që kishte gjenerata e artë e KF Prishtina. Ai e përgëzoi Bellepojën për dokumentarin dhe e vlerësoi këtë projekt si aset të futbollit. Ai tha se gjenerata e artë ishte vërtetë e tillë dhe këtë emër e mori me plotë meritë nga tifozët dhe populli, falë paraqitjeve të jashtëzakonshme në fushën e gjelbër.
Z. Ademi theksoi se tani kur KF Prishtina feston 100-vjetorin e themelimit, kjo gjeneratë e meriton mirënjohjen jetësore. Ai në këtë event nuk la pa përmendur edhe gjeneratën e sakrificës apo siç njihet ndryshe edhe si gjenerata e rezistencës ndaj pushtuesit, e cila gjithë karierrën e vet e kaloi jashtë objekteve sportive, por me një mision të veçantë për ta vazhduar rrugën e futbollit dhe të mos lejojë shkëputjen e zinxhirit, pasi kampionati i asaj kohe konsiderohej si segment i rëndësishëm i shtetësisë së Kosovës.
Ndërkaq, Abdyl Bellopoja falënderoi të gjithë trajnerët dhe bashkëlojtarët e tij gjatë karrierës, familjen e tij dhe tifozët nga të gjitha trojet shqiptare për mbështetjen e madhe në kohën e gjeneratës së artë.
Përgatiti:
