Instituti Hidrometeorologjik i Kosovës (IHMK) ka njoftuar se gjatë datave 18 dhe 19 nëntor, disa zona të vendit pritet të përballen me reshje shiu të intensitetit të lartë, të cilat mund të shkaktojnë vërshime të shpejta në disa lokalitete.
Sipas IHMK-së, bazuar në të dhënat, modelet dhe vrojtimet e kushteve hidrometeorologjike, reshjet më intensive mund të prekin rrjedhat e mesme dhe të poshtme të lumenjve si Drini i Bardhë, Bistrica e Prizrenit, Mirusha, Toplluha, Ereniku dhe Bistrica e Deçanit, si dhe disa rrjedha me karakter malor.
Instituti u bën thirrje qytetarëve të jenë të kujdesshëm, të ndjekin njoftimet e meteorologëve dhe të marrin masat e nevojshme për parandalimin e pasojave nga vërshimet./Katror.info
