India është vendi me popullsinë më të madhe të tigrit në botë, me mbi 3 mijë e 600 tigra të egër që përbëjnë rreth 75% të popullsisë globale. Sipas Raportit Kombëtar për Vlerësimin e Tigrit 2023, këta tigra jetojnë në një sipërfaqe prej 138,200 kilometrash katrorë, duke e bërë Indinë një nga strehimet kryesore për ruajtjen e këtij specieje të rrezikuar.
Kryeministri Narendra Modi ka theksuar rëndësinë e mbrojtjes së tigrit dhe kafshëve të tjera, duke vënë në pah përgjegjësinë e madhe për të garantuar të ardhmen e tyre. Por pavarësisht rritjes së numrit të tyre, tigri vazhdon të jetë në rrezik për shkak të shkatërrimit dhe fragmentimit të habitatit.
Ekspertët e mjedisit paralajmërojnë se shpyllëzimi, zgjerimi i zonave bujqësore, urbanizimi dhe ndërtimi i infrastrukturës kanë copëtuar habitatet e tigrit në pjesë më të vogla.
Mundesh me e lexu edhe…
Sipas konservacionistit Ravi Chellam, problemi nuk qëndron vetëm në madhësinë e habitatit, por edhe në cilësinë e tij.
“Në shumë raste, habitatet janë të degraduara, të pushtuara nga specie të huaja dhe nën presionin e ndryshimeve klimatike”, deklaroi ai shkruan Deutshe Welle.
India ka 58 rezervate tigri të shpërndara në 18 shtete, por në disa zona, si rajoni qendror me rezervatet Kanha, Pench dhe Tadoba, fragmentimi i pyjeve është alarmant për shkak të rrugëve, hekurudhave dhe minierave.
Një nga rreziqet më të mëdha është reduktimi i habitatit në rezervatin Sariska në Rajasthan, ku një plan qeveritar parashikon lehtësimin e rindërtimit të minierave në zonat e mbrojtura të tigrit, duke rrezikuar korridoret e lëvizjes së tyre.
Nga ana tjetër, tigri Bengal në mangrovet e Sundarbans, mes Indisë dhe Bangladeshit, po përballet me shkatërrimin e habitatit për shkak të rritjes së nivelit të detit dhe erozionit bregdetar.
India po përdor teknologji moderne, si kamerat kapëse, analizat gjenetike dhe sistemin M-STrIPES, për të monitoruar dhe mbrojtur tigrat, por sfidat mbeten të mëdha. Konfliktet me njerëzit, insurgjencat në disa rajone dhe sidomos qëndrimet dhe sjelljet njerëzore ndikojnë ndjeshëm në fatin e tigrit.
Një problem tjetër i pazakontë është edhe balanca e pabarabartë gjinore e tigrit në disa rezervate, ku numri i meshkujve është në rritje, duke shkaktuar tensione në territor dhe në mënyrën e jetesës së këtyre kafshëve./AP/Katror.info
