Java Ndërkombëtare e Parasë ka nisur zyrtarisht në Kosovë, duke sjellë aktivitete të shumta që synojnë edukimin financiar të fëmijëve dhe të rinjve. Në kuadër të kësaj fushate globale, shkolla fillore “Dituria” në fshatin Shkabaj të Prishtinës ka zhvilluar një program të veçantë për të mësuar nxënësit mbi rëndësinë e kursimit dhe menaxhimit të parasë, shkruan Katror.info.
Përmes aktiviteteve edukative, fëmijët po mësojnë si të planifikojnë shpenzimet dhe të kursejnë për të ardhmen. “Kam mësuar që nuk duhet t’i shpenzojmë paratë për gjëra të panevojshme dhe se kursimi është i rëndësishëm për të ardhmen tonë”, tha nxënësja Altuna Isufi. Ndërsa Reina Preniqi theksoi rëndësinë e shpenzimeve për nevoja të përditshme, si ushqimi, veshjet dhe librat.
Shoqata e Bankave të Kosovës e vlerëson edukimin financiar si një shtyllë kyçe për një shoqëri të qëndrueshme. “Jemi fokusuar tek të rinjtë dhe nxënësit e shkollave fillore që ata të njihen me konceptin e parasë që në moshë të re”, u shpreh Vesa Vuçitërna, zyrtare për Komunikim dhe Marketing në Shoqatën e Bankave.
Mundesh me e lexu edhe…
Në kuadër të aktiviteteve, Banka Qendrore e Kosovës ka shpallur fituesit e konkurseve për edukimin financiar, duke ndarë shpërblime për 25 nxënës në kategoritë e videove dhe punimeve artistike. Gjatë ceremonisë së ndarjes së çmimeve, Guvernatori Ahmet Ismaili theksoi rëndësinë e mbrojtjes së konsumatorëve dhe përgatitjes së të rinjve për sfidat e reja financiare. “Bota po ndryshon shpejt, dhe ne duhet të jemi të gatshëm për të përballuar transformimin digjital dhe teknologjik”, tha ai.
Java Ndërkombëtare e Parasë, e organizuar nga OECD dhe e shënuar në 176 vende të botës, këtë vit mbahet me moton “Mendo para se të klikosh, për një siguri financiare nesër”. Aktivitetet në Kosovë do të zhvillohen nga data 17 deri më 21 mars 2025, duke synuar rritjen e ndërgjegjësimit mbi rëndësinë e edukimit financiar për të gjithë qytetarët, veçanërisht për fëmijët dhe të rinjtë./Katror.info
Përgatiti:
