Kalaja e Prizrenit mbetet lokaliteti arkeologjik më i vizituar i qytetit. Mijëra turistët vazhdojnë të ngjiten për të përjetuar këtë monument që simbolizon historinë mijëvjeçare të qytetit dhe ofron pamje mahnitëse të peizazhit urban dhe natyrës përreth.
Akil Çejku, student nga Prizreni, viziton shpesh kalanë dhe shpesh has në vizitorë vendorë dhe të huaj. “Turistët e vizitojnë sepse është kurora e qytetit dhe ofron një pamje të mrekullueshme të Prizrenit nga lart. Ajo përfaqëson një pjesë të rëndësishme të historisë së qytetit,” thotë ai.
Aktivitetet kulturore gjatë verës kanë gjallëruar zonën. “Këtë vit, kam qenë në kala afro njëzet herë, kryesisht për shkak të angazhimit si vullnetar në DokuFest,” shton ai.
Përveç DokuFest-it, Kalaja është bërë një qendër për shumë festivale dhe ngjarje të tjera kulturore, të cilat tërheqin gjithnjë e më shumë vizitorë. Ilir Çollaku, një banor tjetër i Prizrenit, përshkruan emocionin e ngjitjes dhe pamjen mbresëlënëse të qytetit nga lart.
“Vizita në Kalanë e Prizrenit është një përvojë unike, ku kujtimet e fëmijërisë dhe legjendat e kalasë ngjallen çdo herë që e vizitoj,” thotë ai për Telegrafin.
Vesel Hoxhaj nga Njësia Menaxhuese e Kalasë së Prizrenit thekson rëndësinë e mirëmbajtjes dhe zhvillimit të mëtejshëm të këtij monumenti historik, duke shtuar se ekzistojnë plane për ta bërë Kalanë një destinacion edhe më tërheqës për turistët në të ardhmen./Katror.info
