Shefja e diplomacisë së Bashkimit Evropian, Kaja Kallas, ka konfirmuar sot gjatë qëndrimit të saj në Tiranë se javën e ardhshme do të realizojë një vizitë zyrtare në Kosovë, shkruan Katror.info.
Kallas bëri të ditur se kjo vizitë është diskutuar gjatë darkës joformale të mbrëmshme me liderët e Ballkanit Perëndimor, që u organizua në kuadër të Samitit të Komunitetit Politik Evropian, ku po merr pjesë edhe Presidentja e Republikës së Kosovës, Vjosa Osmani.
“Po, do të vizitoj Kosovën javën e ardhshme. Për këtë kemi diskutuar gjatë darkës së liderëve të Ballkanit Perëndimor,” tha Kallas në një prononcim për mediat nga Tirana, duke theksuar rëndësinë që Bashkimi Evropian i kushton zhvillimeve në rajon.
Mundesh me e lexu edhe…
Kallas, e cila u emërua së fundmi si Përfaqësuese e Lartë e BE-së për Punë të Jashtme dhe Politikë të Sigurisë, ka paralajmëruar gjithashtu se përveç Kosovës, do të vizitojë edhe Serbinë. Në një deklaratë për media të mërkurën pas takimit të Këshillit për Punë të Jashtme në Luksemburg, ajo theksoi rëndësinë e vazhdimit të dialogut ndërmjet Prishtinës dhe Beogradit.
“Sa u përket Serbisë dhe Kosovës, është e qartë se normalizimi i marrëdhënieve të tyre është i rëndësisë më të madhe. Për këtë arsye duhet të vazhdojë dialogu midis Beogradit dhe Prishtinës,” deklaroi Kallas.
Vizita e paralajmëruar e Kallas në Kosovë pritet të përqendrohet në avancimin e dialogut të ndërmjetësuar nga BE-ja dhe në thellimin e bashkëpunimit me autoritetet e Kosovës, në një moment kritik për stabilitetin dhe integrimin evropian të rajonit./Katror.info
