Liqeni i Batllavës ishte mikpritësi i edicionit të parë të KayakFest 2024, një ngjarje që premton të bëhet një traditë vjetore në kalendarin e aktiviteteve verore në Kosovë.
Ky festival jo vetëm që mblodhi entuziastët e sporteve ujore nga mbarë vendi, por gjithashtu shërbeu për të ngritur ndërgjegjësimin dhe për të mbledhur fonde për një kauzë të rëndësishme siç është mbështetja e personave me Sindromin Down.
Siç shpjegon organizatori i festivalit, Shkrep Balidemaj, çdo kontribut për pjesëmarrje në festival duke filluar nga 1 euro e më shumë, ka shkuar për kauzën në fjalë.
”Ne njerëz jemi, normal që në ato ndjenjat e emocionet për me ndihmu, e kemi ndoshta edhe prej natyrës. Si ide nuk e kemi përcaktu në fillim se kujt me i ndihmu, d.m.th., idea ka qenë, në qoftë se fillon festivali, patjetër që duhet me qenë dikush pjesëmarrës me kontribu diçka për të, qoftë një familje, qoftë një person ose qoftë një institucion që me të vërtetë ka nevojë për ndihmën tonë, sado që e vogël është, e kemi vendosë me bashkëpunimin e shumë tjerëve, kemi vendosë brenda këtij komuniteti me e ba një bashkëpunim me personat me Sindomin Down”, shprehet Balidemaj.
Përfshirja e personave me Sindromin Down në shoqëri është thelbësore për të promovuar barazinë, ndërgjegjësimin dhe pranimin e diversitetit njerëzor. Në festivalin e Kajakut të këtij viti, pjesëmarrësit me sindromin Down u panë të angazhuar plotësisht në lojëra dhe aktivitete, duke përjetuar një gëzim të veçantë dhe të pastër që u transmetua te të gjithë të pranishmit.
Lidhur me këtë Balidemaj tha se argëtimi dhe socializimi i personave me sindrom Down është puna më e mirë dhe më e këndshme që ka bërë deri tani.
”Për mua ka qenë puna ose si me thënë ndjenja më e mirë edhe kur po i shoh prezent këtu edhe kur po i shoh duke i shoqëru me të tjerët edhe janë një komunitet që të kënaqin, d.m.th., janë shumë të hareshëm, janë shumë njerëz që ia vlenë me kalu ditën me ta”, theksoi ai.
Buzëqeshjet e personave me sindromin Down ishin një përkujtim i fuqisë së përfshirjes dhe rëndësisë së krijimit të mundësive për të gjithë.
Ndër të tjera pjesëmarrja e personave me sindromin Down në aktivitete të tilla mundëson shprehjen dhe zhvillimin e shkathtësive dhe talenteve të kësaj kategorie shoqërore.
Lidhur me këtë përfaqësuesja e Down Sindrome Kosova, Marigona Sadiku na tha se kjo është edhe rëndësia kyçe e pjesëmarrjes së këtyre personave në këto tubime shoqërore.
“Ka qenë një bashkëpunim mjaft frytdhënës përgjatë këtyre tri ditëve ku anëtarët me Sindromin Down përveç që kanë marrë mësimet e para dhe kanë provuar për herë të parë sportin e kajakut ata gjithashtu kanë qenë pjesëmarrës dhe kanë kontribuuar në mbarëvajtjen e festivalit përgjatë tri ditëve, anëtarët tanë kanë kryer detyra në hyrje të festivalit. Personat me Sindromin Down si përgjatë këtyre tri ditëve kanë treguar aftësitë e tyre si për zhvillimin e potencialit që edhe ata mund të kontribuojnë në komunitetin, që edhe ata mund të bëjnë një punë nëse ua ofrojmë mundësinë personave me Sindromin Down, dhe ju japim hapësirë qoftë në festivale të ndryshme apo në aktivitete të ndryshme që kryeqyteti i Prishtinës, apo secili qytet që organizon”, theksoi Sadiku.
Marrë parasysh sfidat dhe mungesën e përkrahjes që organizatat për kategoritë e ndijshme të shoqërisë sonë kalojnë për të plotësuar kushtet e veprimtarisë së tyre, kauza e tillë, të cilën KayakFest përfshiu qysh në edicionin e parë kontribuon në mbarëvajtjen e aktiviteteve tjera që shoqata si kjo e Down Sindrome Kosova realizojnë për anëtarët e tyre.
Për këtë Marigona thotë se avokojnë vazhdimisht që të bëhen pjesë e projekteve të tilla
“Aktivitetet e tilla siç ishte edhe festivali i fundit janë shumë të rëndësishme për shoqatën Down Sindrome Kosova, për arsye se në kuadër të dy programeve të saj: Në kuadër të programit për edukim dhe intervenim të hershëm dhe programin për autonomi dhe aftësim profesional, në pesë qendrat e saj: në Prishtinë, Prizren, Mitrovicë, Gjilan dhe Ferizaj, ofrojnë shërbime pa pagesë përreth 300 anëtarë të cilët i marrin këto shërbime të cilat janë më se të nevojshme. Duke marrë parasysh rëndësinë dhe qëndrueshmërinë e tyre, për shoqatën Down Sindrome Kosova, aktivitetet e tilla janë shumë të mirëpritura, pasi çdo e hyrë brenda shoqatës shkon direkt për qëndrueshmërinë e shërbimeve të cilat janë mëse të nevojshme për anëtarët me Sindromin Down”, tha ajo.
Përveç shumës simbolike që mblodhi KayakFest, socializimi i përgjithshëm ishte një nga elementët kryesorë të kësaj dite, duke krijuar lidhje të reja midis njerëzve që ndajnë të njëjtën pasion për natyrën dhe aventurën.
Ky festival dëshmoi të jetë më shumë se një ngjarje sportive dhe argëtuese, duke shfaqur potencialin në ndikimin e aktivizimit shoqëror në forma të ndryshme, pastaj në promovimin e turizmit e po ashtu, festivali i dha një shtysë ekonomike bizneseve lokale, si dhe atyre që morën pjesë në organizimin duke ndihmuar edhe në promovimin e produkteve të tyre.
Për këtë Balidemaj shtoi se aktivizimi dhe përfitimi nga ky festival ishte i shumanshëm.
” Në radhë të parë, si shërbim normal që i rinisë, popullatës, po e dyta, besoj që edhe pjesës së komunitetit që gjindet ketu, d.m.th., jemi në zonën e Orllanit, te liqeni i Batllavës. Besoj që për komunitetin këtu përreth është një plus i madh për ta, për shkak se shumica dhe nuk e njohin si zonë e kanë dëgju si vend, mirëpo nuk është që e kanë vizitu dhe sot ka shumë prej atyne që janë habitur me bukurinë dhe me me pamjen që kanë pa, pos domethënë tjerave që, edhe banorët këtu janë aktivizu me ndihmu, me pastru vendin me lloj – lloj ndihme, me pru elektrikën, pra në çdo lloj forme janë aktivizu. Normal që është e mirë për ta, e kanë pritë me shumë gëzim njëfarë forme, për shkak se shumica e familjeve varen dhe prej të hyrave që i kanë në këtë kohë, prej kësaj zone”, u shpreh Balidemaj.
Me përmirësime dhe zgjerime të planifikuara, KayakFest pritet të bëhet një nga ngjarjet më të pritura verore në Kosovë, duke kombinuar argëtimin, sportin dhe mbështetjen për kauzat e mira në një përvojë të vetme. /Katror.info
Edicionin #58 të plotë e gjeni KËTU 🙂
Përgatiti:
