Këshilltari i Behgjet Pacollit, Jetlir Zyberaj, i cili ka qenë më kreun e AKR-së në Kenia në momentin kur edhe zyrtarisht është kumtuar njohja e pavarësisë së Kosovës, në një shkrim në profilin e tij ka thënë se s’duhet të humbet momentumi i krijuar, shkruan Express.
Zyberaj ka thënë se njohja nga Kenia mund të hapë një valë të re të njohjeve për Kosovën dhe sipas tij, Kosova duhet të hapë Ambasadën në kryeqytetin e Kenias, Nairobi, pa vonesa.
Ai shkruan se është koha për të rikthyer vrullin diplomatik, për të ndërtuar një politikë aktive të njohjeve ”sidomos drejt vendeve që nuk janë në fokus të politikës tonë tradicionale – si Afrika, Azia, Karaibet dhe Amerika Latine”
Postimi i plotë:
Të mos e humbasim momentumin: Njohja nga Kenia është thirrje për veprim diplomatik
Njohja e Kosovës nga Kenia është një zhvillim historik dhe një mesazh i fuqishëm që politika e jashtme e Kosovës duhet ta dëgjojë me kujdes. Si një prej shteteve më me ndikim në Afrikën Lindore dhe si anëtare themeluese e Unionit Afrikan, Kenia nuk është vetëm një mik i ri – por një portë drejt njohjeve të tjera dhe një dëshmi se vullneti për të njohur Kosovën ekziston.
Kam pasur privilegjin të kontribuoj personalisht nën direktivat e presidentit Behgjet Pacolli në këtë njohje dhe mbetem i gatshëm të ndihmoj tutje. Por është Kosova që tani duhet të veprojë.
Për vite me radhë, një qasje pasive e politikës së jashtme dhe vetë-imponimi i një moratoriumi të heshtur nga qeveria, e ka vendosur Kosovën në një pozitë të pafavorshme ndërkombëtare. Pozicioni që nuk do të kërkojmë njohje se nuk e kemi premtuar ka qenë i dëmshëm – jo vetëm për interesin tonë strategjik, por edhe për perceptimin ndërkombëtar mbi seriozitetin dhe sovranitetin tonë.
Është koha për të rikthyer vrullin diplomatik, për të ndërtuar një politikë aktive të njohjeve, sidomos drejt vendeve që nuk janë në fokus të politikës tonë tradicionale – si Afrika, Azia, Karaibet dhe Amerika Latine.
Njohja nga Kenia nuk është vetëm simbolike. Ajo ka potencial të hapë një valë të re njohjesh, dhe presidenti serb Vuçiq në reagimin e tij të menjëhershëm, e pranoi publikisht frikën nga një “trend i njohjeve”.
Njohja nga Kenia është një pikë kthese. Por kjo pikë kthese kërkon angazhim shtetëror serioz dhe vizion të qartë diplomatik. Shtetet nuk do të vijnë vetë tek ne. Duhet të shkojmë ne tek ato – me strategji, miqësi, dhe qasje të personalizuar diplomatike.
Kenia meriton që Kosova të hapë një ambasadë në Nairobi. Kjo nuk është vetëm një mirënjohje për njohjen – është një investim në marrëdhënie dypalëshe dhe një bazë për një politikë të jashtme më dinamike në kontinentin afrikan.
Sot, Kosova ka potencialin, miqtë dhe përvojën për të ndërtuar një politikë të re të afirmimit ndërkombëtar, por kjo nuk do të ndodhë me deklarata, por me veprim, vizion dhe diplomaci të guximshme.
Si njeri që kam qenë në terren, i angazhuar dhe i përkushtuar ndaj shtetit tim, e përsëris: ka shtete që duan ta njohin Kosovën. Ka liderë që presin një shenjë vullneti. Kosova nuk ka më kohë për të humbur. /Katror.info
Përgatiti:
