Falë filmave e Super Mario Bros. Movie, M3GAN dhe Oppenheimer, Universal Pictures u bë studio filmike me fitimin më të madh në 2023, shkruan Variety.
Universal Pictures publikoi 24 filma vitin e kaluar që fituan më shumë se 4.9 miliardë dollarë në total, duke e rreshtuar përpara Disney, i cili fitoi 4.8 miliardë dollarë.
Kjo është hera e parë që nga viti 2015 që Disney nuk e merr titullin e studios filmike me fitimet më të larta. Po kështu, Disney nuk pati asnjë film me fitim mbi një miliardë dollarë këtë vit. Filmi më i suksesshëm i këtij gjiganti filmik dhe njëkohësisht i vetmi film që ka realizuar një fitim të konsiderueshëm ishte Guardians of the Galaxy vol. 3, i cili fitoi 845 milionë dollarë.
Disney ka një problem të madh me filmat me buxhet të lartë që kalon 200 milionë dollarë, sepse nuk po arrijnë të mbulojnë kostot e tyre me të ardhurat e fituara. Për shembull, Ant-Man and the Wasp: Quantumania fitoi 476 milionë dollarë, duke e bërë atë filmin e dhjetë me fitimet më të larta të vitit 2023, por kjo nuk ishte e mjaftueshme për të sjellë një fitim për studion.
Pas Universal dhe Disney, vendin e tretë e zuri Warner Bros, me fitime prej 3.84 miliardë dollarësh. Filmat Barbie, The Nun II dhe Wonka sollën sukses të madh në studio.
Vendet e katërt dhe të pestë, sipas vlerësimeve të ekspertëve, ndahen nga Sony dhe Paramount, të cilat ende nuk i kanë publikuar raportet e tyre vjetore.
Të dyja studiot besohet se kanë fituar rreth 2 miliardë dollarë, me Sony që zë vendin e katërt falë Spider-Man: Across the Spider-Verse, Equalizer 3 dhe Napoleon.
Në vendin e pestë është Paramount, që vitin e kaluar publikoi filmat Mission: Impossible – Dead Reckoning Part One, Dungeons & Dragons: Honor Among Thieves dhe PAW Patrol: The Mighty Movie, duke fituar 2.03 miliardë dollarë. /Katror.info