Një hap tjetër drejt fuqizimit të pozitës ndërkombëtare të institucioneve të drejtësisë në Kosovë është shënuar me anëtarësimin e Gjykatës Kushtetuese të Republikës së Kosovës në Asociacionin e Gjykatave Kushtetuese Frankofone (Association des Cours Constitutionnelles Francophones – ACCF), shkruan Katror.info.
Pranimi u formalizua pas votimit në Asamblenë e Përgjithshme të Kongresit të 10-të të këtij asociacioni, mbajtur në Bukuresht të Rumanisë nga 6 deri më 8 maj 2025.
“Pranimi i Gjykatës Kushtetuese të Kosovës në ACCF është bërë pas shqyrtimit të kërkesës për anëtarësim dhe votimit në Asamblenë e Përgjithshme të Kongresit të 10-të të Asociacionit të Gjykatave Kushtetuese Frankofone, mbajtur më 6 – 8 maj 2025, në Bukuresht të Rumanisë”, thuhet në njoftimin zyrtar të Gjykatës Kushtetuese të Republikës së Kosovës.
Mundesh me e lexu edhe…
Ky anëtarësim nënkupton njohje ndërkombëtare për rolin dhe zhvillimin e Gjykatës Kushtetuese të Kosovës në përforcimin e sundimit të ligjit dhe mbrojtjen e të drejtave themelore të njeriut. Me këtë rast, Gjykata e Kosovës i bashkohet rrjetit të pesëdhjetë (50) gjykatave kushtetuese dhe institucioneve ekuivalente nga katër kontinente – Afrika, Evropa, Amerika dhe Azia – që janë pjesë e AC
ACCF, e themeluar në vitin 1997, synon të forcojë bashkëpunimin ndërmjet gjykatave kushtetuese në hapësirën frankofone, të promovojë të drejtat themelore dhe të kontribuojë në konsolidimin e demokracisë. Selia e saj gjendet pranë Këshillit Kushtetues të Francës, ku ndodhet edhe Sekretariati i Përhershëm i këtij asociacioni.
Ky anëtarësim përbën një hap domethënës për Kosovën jo vetëm në aspektin juridik, por edhe diplomatik dhe kulturor, duke thelluar lidhjet me vendet frankofone dhe duke përmirësuar profilin ndërkombëtar të gjyqësorit të saj. Gjykata Kushtetuese e Kosovës, përveç këtij zhvillimi, është tashmë edhe anëtare me të drejta të plota e Konferencës Evropiane të Gjykatave Kushtetuese (CECC), si dhe anëtare themeluese e Forumit Ballkanik të Gjykatave Kushtetuese. /Katror.info
Përgatiti:
