Forca e Sigurisë së Kosovës (FSK) dhe Komanda e Forcave të Shteteve të Bashkuara për Evropë (EUCOM) kanë nënshkruar një marrëveshje bashkëpunimi për Ndërveprueshmëri dhe Siguri në Komunikim (CISMOA), gjatë një takimi zyrtar të mbajtur sot në Prishtinë, shkruan Katror.info.
Marrëveshja u nënshkrua nga Komandanti i FSK-së, Gjenerallejtënant Bashkim Jashari, dhe Drejtori i J6 në EUCOM, Gjeneral Major John Phillips, i cili ndodhet për një vizitë zyrtare në Kosovë.
Në këtë takim, palët diskutuan për sfidat e sigurisë kibernetike dhe rëndësinë e avancimit të bashkëpunimit në fushën e komunikimit të sigurt dhe të mbrojtur. Gjeneral Jashari falënderoi gjeneralin amerikan për mbështetjen e vazhdueshme dhe bashkëpunimin profesional ndërmjet dy institucioneve, ndërsa Gjeneral Phillips vlerësoi përparimin e FSK-së dhe angazhimin e saj në zhvillimin e kapaciteteve të sigurisë.
Mundesh me e lexu edhe…
Marrëveshja CISMOA synon të forcojë ndërveprueshmërinë teknologjike ndërmjet FSK-së dhe forcave amerikane, duke mundësuar shkëmbimin e informacionit të sigurt dhe përdorimin e pajisjeve të avancuara të mbrojtjes dhe kriptografisë.
Zyrtarët theksuan se kjo marrëveshje paraqet një hap të rëndësishëm në rrugën e forcimit të bashkëpunimit strategjik dhe ndihmon në përgatitjen e FSK-së për sfidat moderne të sigurisë. EUCOM pritet të vazhdojë të luajë një rol kyç në mbështetjen dhe zhvillimin e mëtejshëm të kapaciteteve mbrojtëse të Kosovës./Katror.info
