Banka Qendrore e Republikës së Kosovës (BQK), në bashkëpunim me Zyrën e Bashkimit Evropian në Kosovë dhe institucionet e tjera përkatëse, ka ndërmarrë një hap të rëndësishëm në drejtim të forcimit të kapaciteteve të vendit për të parandaluar dhe luftuar paratë e falsifikuara, shkruan Katror.info.
Kjo iniciativë vjen si pjesë e një projekti të mbështetur nga programi TAIEX i Bashkimit Evropian, me synimin për të harmonizuar praktikat e Kosovës me standardet evropiane në këtë fushë.
Gjatë periudhës tetor 2024 deri në prill 2025, me asistencën e ekspertëve nga Banka Kombëtare e Kroacisë, është punuar intensivisht për zhvillimin e një kornize të re ligjore dhe institucionale që synon përmirësimin e reagimit të shtetit ndaj rrezikut të falsifikimit të valutës.
Mundesh me e lexu edhe…
Një ndër arritjet kyçe të këtij projekti është hartimi i projektligjit për mbrojtjen dhe luftimin e parave të falsifikuara në Republikën e Kosovës. Ky dokument është zhvilluar me pjesëmarrjen aktive të të gjitha institucioneve relevante dhe përcakton qartë rolet dhe përgjegjësitë e secilit aktor institucional në këtë proces, ndërsa pritet të procedohet në përputhje me legjislacionin në fuqi.
Në kuadër të strukturës së re, është paraparë themelimi i disa qendrave të specializuara, të cilat do të veprojnë në kuadër të institucioneve përkatëse. Këto përfshijnë Qendrën Kombëtare për Paratë e Falsifikuara pranë BQK-së, Zyrën Qendrore Kombëtare brenda Policisë së Kosovës, si dhe dy qendra analitike në kuadër të Agjencisë Kosovare për Forenzikë – njëra për analiza të përgjithshme dhe tjetra për analizën e monedhave. Po ashtu, do të krijohet edhe një sistem i dedikuar për monitorimin dhe raportimin e rasteve të parave të falsifikuara, që do të ndihmojë në ndërtimin e një baze të fortë të të dhënave dhe reagimit të shpejtë institucional.
Projekti ka kontribuar ndjeshëm në rritjen e kapaciteteve të autoriteteve vendore për të zbuluar, gjurmuar dhe parandaluar paratë e falsifikuara në mënyrë më efektive. Në të njëjtën kohë, ai ka për qëllim të forcojë koordinimin ndërinstitucional dhe të rrisë besimin e qytetarëve në sigurinë e sistemit financiar të vendit. BQK ka bërë të ditur se do të vazhdojë përkushtimin e saj për zbatimin e plotë të këtyre masave dhe për thellimin e bashkëpunimit me partnerët ndërkombëtarë në këtë fushë./Katror.info
