Kosova ka dhënë shenja të mira në miqësoret e marsit. Sinjale pozitive priten edhe të mërkurën mbrëma në Oslo, për të dëshmuar se “Dardanët” janë gati për sfidat e ardhshme garuese, përkatësisht për edicionin e radhës të Ligës së Kombeve të UEFA-s.
Të mërkurën, prej orës 19:00, është miqësorja Norvegji – Kosovë, që zhvillohet në stadiumin “Ullevaal” në Oslo.
Më 22 mars Kosova kishte fituar 1:0 ndaj Armenisë. Më 26 mars pësoi 2:0 nga Hungaria. Dhe tani përballë ka një tjetër përfaqësuese me lojtarë cilësorë, si Erling Haaland e Martin Odegaard. Por jo gjithë lojtarët e Norvegjisë kanë cilësinë e yjeve të Premier Leauges. Mungesa në Evropianin në Gjermani është dëshmi për këtë, shkruan koha.
Mundesh me e lexu edhe…
Për selektorin e Kosovës, Franco Foda, miqësorja me norvegjezët është shumë e rëndësishme. Foda debutoi në ndeshjet e marsit, ndërsa pritjet janë që ta lëvizë para përfaqësuesen.
Në konferencën për shtyp të mbajtur të martën pasdite në Oslo, Foda ka thënë se faza përgatitore ishte e mirë. Tekniku gjerman ka konfirmuar se të gjithë lojtarët e ftuar janë gati dhe po ashtu të entuziazmuar për ndeshjen.
“Kishte shenja të mira në ndeshjet ndaj Armenisë dhe Hungarisë. Disa lojtarë janë të lënduar, si Rashica e Muslija, sa për të përmendur disa. Stërvitjet në Prishtinë kanë shërbyer për të kuptuar edhe më mirë parimet tona të lojës, që të jemi aktivë në gjithë fushën. Duam të luajmë me top dhe në mënyrë dimanike. Pasi të humbim topin duam të bëjmë presion të menjëhershëm dhe kjo ka funksionuar në dy ndeshjet e kaluara miqësore. Duam të provojmë sërish me presing të lartë dhe ta fitojmë topin sa më shpejt që të jetë e mundur”, ka thënë Foda.
Ai tutje ka thënë se për Kosovën është e rëndësishme që në këtë ndeshje të funksionojë si ekip, në mënyrë që të përballet me sukses kundër një ekipi që në radhët e veta ka futbollistë shumë cilësor si Haaland e Odegaard.
“Natyrisht se duam të fitojmë ndeshjen nesër, por për mua është e rëndësishme se si luajmë dhe si do ta zbatojmë në lojë atë që kemi bërë në stërvitje”, ka shtuar ai.
Ndërkaq, mesfushorin Valon Berisha, ka thënë se kjo miqësore është e veçantë për të, duke pasur parasysh se para pranimit të Kosovës në UEFA e FIFA ka qenë pjesë e Norvegjisë dhe familja e tij jeton në këtë shtet.
“Kur unë kam luajtuar në Norvegji, kanë qenë lojtarë tjerë dhe trajner tjetër. Jemi të vetëdijshëm që kanë shumë lojtarë të mirë, por ne jemi të përqendruar në lojën tonë. Kemi dëshirë të tregojmë çka kemi ushtruar deri më tani dhe çka do të tregojme në fushë në të ardhmen. Jam rritur në këtë shtet dhe si i huaj në Norvegji ka qenë privilegj që kam pasur rastin të luaj. Por, unë jam krenar që kam vendosur që ta përfaqësoj Kosovën, vendin tim, gjakun tim dhe për Kosovën gjithmonë do ta lë shpirtin në fushë”, ka thënë Berisha.
Në ndeshjen e sotme pritet që Dardanët të kenë mbështetje të madhe edhe nga bashkatdhetarët që jetojnë në shtetet skandinave./Katror.info
Përgatiti:
