Sot Kosova luan përballë Izraelit në Tel-Aviv nga ora 18:00, duke nisur kështu ciklin kualifikues për “Euro 2024”. Kosova dhe Izraeli ndodhen në Grupit I të kualifikimeve. Përzgjedhësi i Kosovës, Alain Giresse, ka folur në konferencën për media para kësaj ndeshjeje.
Giresse e ka pranuar se nuk do të jetë lehtë, por beson që Kosova e ka fituar përvojën dhe mund ta nisë me fitore.
“Ne jemi këtu për fushatën kualifikuese të cilën e nisim me Izraelin. Kemi bërë përgatitjet tona maksimale dhe sigurisht që synimet i kemi për rezultat pozitiv. Jemi përgatitur në çdo aspekt për këtë ndeshje, gjë që është e rëndësishme”.
Mundesh me e lexu edhe...
“Të gjithë lojtarët janë gati dhe kanë parasysh rëndësinë e duelit. Nuk kemi të lënduar, të gjithë janë në formë të mirë dhe të gatshëm për të dhënë maksimumin nga vetja”.
“Gjasat e Kosovës për kualifikim nuk varen vetëm nga ndeshja me Izraelin, por edhe nga ndeshjet tjera dhe angazhimi i lojtarëve. Nëse angazhohemi shumë jo vetëm në këtë ndeshje por edhe në të tjerat, atëherë mund ta arrijmë synimin që e kemi në këto kualifikime dhe të jemi në Evropian”, ka thënë Giresse.
Tutje ai ka folur për Izraelin, duke bërë analizën e kundërshtarëve.
“Të gjithë lojtarët janë të rrezikshëm te Izraeli dhe ky është një fakt që nuk mund të nënvlerësohet, pasi nuk është vetëm Manor Solomon. Ne jemi këtu për të luajtur lojën tonë dhe jemi të përqendruar maksimalisht. Synimi është të bëjmë më të mirën, të fitojmë dhe të vazhdojmë tutje”.
“Pa presion nuk mund të fitosh dhe presioni për mua është normal, pasi jemi në kualifikime për Evropian. Shpresoj që ky presion të jetë mbi mua dhe jo mbi ekipin. Është normale që futbollistët e Izraelit janë të motivuar sepse luajnë në shtëpi. Sigurisht që kur je mysafir e ke më vështirë, pasi vendasit kanë edhe përkrahjen e tifozëve që është shumë e rëndësishme”, ka thënë Giresse./Katror.info
Përgatiti:
