Komisioni Qendror i Zgjedhjeve do të mbajë sot një mbledhje nga ora 13:30, ku në rend të ditës janë paraparë disa pika që lidhen me përgatitjet për Zgjedhjet Lokale të vitit 2025, shkruan Katror.info.
Gjatë takimit pritet të shqyrtohet dhe miratohet kërkesa për zëvendësimin e një anëtari të Kuvendit Komunal në Zveçan. Po ashtu, Këshilli për Personel do të paraqesë për shqyrtim një kërkesë për rekrutim të stafit shtesë që do të angazhohet në organizimin e zgjedhjeve. Në anën tjetër, Këshilli për Operacione Zgjedhore do të paraqesë për miratim kërkesat dhe specifikimet teknike për shtypjen e fletëvotimeve, broshurave të kandidatëve dhe listave të votuesve për Zgjedhjet Lokale 2025. Gjithashtu, do të shqyrtohet dhe miratohet rekomandimi për emërimin e anëtarëve të Komisioneve Komunale Zgjedhore në komunat Rahovec, Zubin Potok, Zveçan dhe Partesh.
Mbledhja e sotme konsiderohet një hap i rëndësishëm në kuadër të përgatitjeve institucionale për mbarëvajtjen e procesit zgjedhor në nivel lokal, duke siguruar funksionim të duhur dhe transparencë në të gjitha fazat e organizimit./Katror.info
