Kupa Botërore e boksit “Felix Stamm”, e cila po mbahet në Varshavë të Polonisë, po hyn në fazën e saj më vendimtare, me disa përballje të zjarrta që pritet të zhvillohen sot.
Në ringun polak do të ngjitet kampionia kosovare, Donjeta Sadiku, e cila do të përballet në kategorinë 60 kilogramë me boksieren vendëse, Alesandra Jankowiak.
Sadiku pritet të performojë në maksimum, ndërsa udhëheqësja e përkohshme e ekipit të Kosovës, Marjola Sallauka, ka shprehur besimin se Donjeta do të dalë fitimtare dhe do të vazhdojë garën drejt një medaljeje.
Mundesh me e lexu edhe…
Në garë për Kosovën do të jetë edhe boksieri Shpetim Bajoku, i cili në kategorinë 70 kilogramë do të sfidojë boksierin nga Uzbekistani, Gofurjon Tokhirov. Selektori Faton Xhakli është optimist për këtë përballje dhe beson në një triumf të Bajokut ndaj kundërshtarit të fortë aziatik.
Ndërkohë, ditën e djeshme, garuesi tjetër kosovar, Bashkim Bajoku, u mposht nga skocezi Cullen Aaron në kategorinë 55 kilogramë, duke i dhënë fund garës për të në këtë turne.
Turneu ndërkombëtar “Felix Stamm” ka nisur më 10 maj dhe do të zgjasë deri më 17 maj, duke mbledhur disa prej boksierëve më të mirë nga e gjithë bota në kryeqytetin polak./Katror.info
