Gjykata Kushtetuese nuk ka një afat të caktuar brenda të cilit duhet të publikojë aktgjykimet, madje as kur vendimmarrja dihet. Nga Kushtetuesja nuk kanë treguar për Radio Kosovën se kur mund të publikohet aktgjykimi përkitazi me kërkesën e PDK-se dhe asaj të LDK-së. Ndërsa, njohësit e çështjeve kushtetuese thonë se kjo mund të ndodhë brenda 10 ditësh, pas publikimit të njoftimit.
Gjykata Kushtetuese, të premten e 8 gushtit publikoi njoftimin e vendimmarrjes përkitazi me kërkesën e PDK-se dhe asaj të LDK-së, për vlerësimin e kushtetutshmërisë së vazhdimeve të seancës konstituive të Kuvendit, të drejtuara nga kryesuesi, që vjen nga Vetëvendosje, Avni Dehari.
Kushtetuesja njoftoi se ka vendosur që deputetët duhet të zgjedhin kreun e Kuvendit të Kosovës përmes votimit të hapur, brenda 30 ditësh dhe se një kandidat për kryeparlamentar mund të votohet vetëm deri në tri herë.
Mundesh me e lexu edhe…
Aktgjykimi i cili ende nuk është publikuar do të hyjë në fuqi në ditën e publikimit nga Kushtetuesja, e pas kësaj mund të thirret vazhdimi i seancës konstituive.
Radio Kosova ka pyetur Gjykatën Kushtetuese se kur pritet të publikohet aktgjykimi lidhur me kërkesën e PDK-së dhe asaj të LDK-së, por nga ky institucion deri tani nuk kanë kthyer përgjigje.
Njohësi i çështjeve kushtetuese, Gëzim Shala, nga Instituti i Kosovës për Drejtësi, thotë se nuk ka një afat të caktuar për publikimin e aktgjykimit.
“Për sa i përket periudhës kohore në mes të njoftimit deri tek aktgjykimi nuk ka një afat specifik, se brenda sa ditësh duhet të publikohet. Një afat i tillë nuk është i caktuar as me Rregulloren e punës e as me Ligjin për Gjykatën Kushtetuese. Mirëpo, supozohet se aktgjykimet do të nxirren brenda një afati të arsyeshëm. Prej praktikës, në shumicën e rasteve periudha në mes të njoftimit dhe publikimit të aktgjykimit zgjat 5 deri në 10 ditë”, tha ai.
Profesori i çështjeve juridike, Mazllum Baraliu po ashtu thotë se nuk ka një afat strikt për publikimin e aktgjykimeve. Sipas tij, bazuar në njoftimin e 8 gushtit, aktgjykimi që pritet të publikohet nga Kushtetuesja ka përgjigje në çështjet kryesore të ngritura nga PDK-ja e LDK-ja.
“Ka përgjigje në pyetjet kryesore të ngritura nga dy partitë e që kanë të bëjnë me konstituimin e kuvendit. Është momenti i fundit që të reflektojnë të gjithë dhe të votojnë kryetarin në ato korniza që ka përcaktuar gjykata dhe ta përfundojnë brenda 30 ditësh çështjen e konstituimit. Ne jemi në një krizë të thellë e paralizë institucionale dhe çdo veprim ndryshe mund të jetë fatal”, tha ai.
Nga 15 prilli kur filloi seanca konstituive e kuvendit e deri më 26 korrik, janë mbajtur 54 vazhdime të seancës, ku deputetët dështuan që ta konstituonin legjislaturën e re të dalë nga zgjedhjet e 9 shkurtit./EO/Katror.info
