Një javë pasi Gjykata Kushtetuese publikoi vendimin lidhur me kërkesën e 10 deputetëve të Listës Serbe për zgjedhjen e nënkryetarëve të Kuvendit, aktgjykimi i plotë ende nuk është bërë publik.
Kjo situatë vazhdon ta mbajë të pezulluar përfundimin e seancës konstituive.
Të martën, Gjykata Kushtetuese ka vendosur që seanca konstituive e Kuvendit të Kosovës nuk ka përfunduar, pa zgjedhjen e nënkryetarit nga komuniteti serb.
Mundesh me e lexu edhe…
Kushtetuesja po ashtu ka obliguar deputetët që të kryejnë edhe çështjen e zgjedhjes së nënkryetarit nga ky komuniteti brenda 12 ditësh, sipas afatit nga aktgjykimi i shkuar.
“TË KONSTATOJË, që Seanca Konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit Serb, dhe Kuvendi nuk është konstituuar në pajtim me përcaktimet e paragrafit 1 të nenit 66 [Zgjedhja dhe Mandati] dhe paragrafët 1 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës”.
“III. TË URDHËROJË, që Seanca Konstituive e Kuvendit të përfundojë brenda afatit të përcaktuar me paragrafin 1 të nenit 66 [Zgjedhja dhe Mandati] të Kushtetutës së Republikës së Kosovës dhe sipas Aktgjykimit të Gjykatës në rastet KO193/25 dhe KO196/25, përkatësisht brenda afatit të mbetur prej 12 (dymbëdhjetë) ditëve nga hyrja në fuqi e këtij Aktgjykimi”, thuhet në njoftim.
Lista Serbe u ankua në Gjykatën Kushtetuese lidhur me votimin ndaras të kandidatëve për nënkryetarë të Kuvendit të Kosovës nga radhët e pakicave.
Për këtë arsye Kushtetuesja vendosi masë të përkohshme nga 5 shtatori deri më 30 shtator, çdo veprim i deputetëve të zgjedhur të institucionit legjislativ u pezullua, po ashtu edhe çdo procedurë për formimin e Qeverisë së re.
Kryeministri në detyrë, Albin Kurti, ka deklaruar se beson se do të arrijë të formojë Qeverinë, pas vendimit të Kushtetueses.
“Unë besoj se do të arrij të formoj Qeverinë. E pranoj sfidën dhe testin e kryetarit Emin Berisha. Pasi të publikohet aktgjykimi i Gjykatës Kushtetuese, që pritet të publikohet javën e ardhshme, jam i gatshëm dhe i interesuar të ulem me partitë e tjera dhe të ecim përpara, për të arritur një zgjidhje të përbashkët”, është shprehur ai gjatë javës së kaluar.
Ai kishte akuzuar Gjykatën Kushtetuese se po funksionon si “hije politike” e opozitës ndaj Lëvizjes Vetëvendosje. Kjo deklaratë nxiti reagimin e ndërkombëtarëve, të cilët kërkuan që sulmet ndaj Kushtetueses të ndalen.
Ndërkohë, presidentja Vjosa Osmani njoftoi se ekipi i saj ligjor po shqyrton nëse Kuvendi është konstituar apo jo. Ajo gjithashtu u shpreh se kanë dërguar dy komente në Kushtetuese lidhur me kërkesën e Listës Serbe.
I pari lidhej me “parimin e mosabuzimit të të drejtave të garantuara me Kushtetutë”, ndërsa i dyti me faktin se “Kuvendi i Kosovës nuk mund të bllokohet si pasojë e ndonjë partie apo komuniteti”.
Dimal Basha u zgjodh kryetar i Kuvendit të Kosovës në seancën e 26 gushtit, pas pothuajse gjashtë muajsh nga mbajtja e seancës së parë për konstituimin e Kuvendit, ndërkohë që zgjedhjet parlamentare ishin mbajtur më 9 shkurt.
Megjithatë, pavarësisht këtij hapi të rëndësishëm, institucioni legjislativ ngeci sërish në zgjedhjen e të gjithë nënkryetarëve.
Nga pesë nënkryetarët e parashikuar me Kushtetutë, katër u zgjodhën – tre shqiptarë dhe një përfaqësues i pakicave joserbe – ndërsa i pesti, nga komuniteti serb, nuk arriti të siguronte votat e mjaftueshme.
Nënkryetarët e Kuvendit nga radhët e tri partive më të mëdha shqiptare janë: Albulena Haxhiu nga LVV, Vlora Çitaku nga PDK dhe Kujtim Shala nga LDK, ndërsa nënkryetarja nga radhët e grupit multietnik është Emilja Rexhepi./AP/Katror.info
