Një bashkëpunim rajonal për të ndërtuar ura ndërmjet arsimit profesional dhe tregut të punës, The Balkan Forum, në bashkëpunim me Agjencinë për Arsimin dhe Aftësimin Profesional dhe Arsimin për të Rritur, ka organizuar konferencën kombëtare për shtyp dhe tryezën e rrumbullakët, në kuadër të projektit GreenBridge, të financuar nga Bashkimi Evropian, raporton Ekonomia Online.
Konferenca shënoi lansimin zyrtar të projektit në Kosovë, ku u prezantua vizioni, objektivat dhe aktivitetet e tij, si dhe roli kyç i partnerëve nga Kosova, Bosnja dhe Hercegovina, Bullgaria dhe Malta.
Këshilltari i lartë politik në MAShTI, Muhedin Nushi, tha se ky projekt është në përputhje të plotë me politikat e qeverisë dhe mbështet përgatitjen e kuadrove për tregun e ri të punës, duke përmendur suksesin e arsimit dual në Kosovë.
Mundesh me e lexu edhe…
“Një projekt që synon t’i përgjigjet nevojave për rritje për aftësi të reja, sidomos ato që lidhen me tranzicionin e gjelbër dhe digjital, dy shtylla që forcojnë dhe formësojnë më tej të ardhmen e tregut të punës si në Bashkimin Evropian ashtu edhe në rajonin tonë. Nisma të tilla janë në linjë të plotë me politikat e qeverisë dhe ministrisë së arsimit si pjesë qenësore e dokumenteve tona strategjike dhe veprimeve tona konkrete. Treguam se kuptojmë drejt rëndësinë e padiskutueshme të përgatitjes së kuadrove për tregun e punës, këtë e kemi dëshmuar me konsolidimin e arsimit dual brenda një periudhe trevjeçare me rezultate të larta dhe qartë të dukshme. Vetëm brenda muajit të fundit, së bashku me kryeministrin Kurti dhe ministren Nagavci, shënuam diplomimin e gjeneratës së parë të maturantëve të shkollave me mësimin dual. Ky projekt ka për qëllim fuqizimin e ofruesve dhe aftësimin profesional në Kosovë, Bosnjë e Hercegovinë duke iu ofruar mësimdhënësve trajtime.”, ka theksuar Nushi.
Ndërsa drejtoresha e përgjithshme e AAAPARr-së, Fikrije Zymberi, theksoi rëndësinë e zhvillimit të aftësive të gjelbra për një ekonomi të qëndrueshme.
“Është një nismë e rëndësishme, zhvillimi i aftësive të hapësirave të gjelbra që ndikon në zhvillimin ekonomik dhe krijimin e një ekosistemi të qëndrueshëm. Tanimë ne jemi në vazhdën e shumë bashkëpunimeve ndërkombëtare, që kjo është ndër projektet që jemi partner. Agjenda e gjelbër parashihet në shumë dokumente strategjike, që jemi konform tyre.”, theksoi Zymberi.
Projekti synon të fuqizojë arsimin dhe aftësimin profesional (AAP) përmes zhvillimit të aftësive të gjelbërta dhe digjitale, në përputhje me Strategjinë e Arsimit 2022–2026 dhe nevojat e tregut të punës në tranzicion.
Në fjalën hyrëse dhe prezantimet nga partnerët, të pranishmit u njoftuan me kontributet konkrete të secilës organizatë në kuadër të projektit, si dhe mënyrën se si këto aktivitete do të ndikojnë tek të rinjtë, mësimdhënësit dhe institucionet arsimore.
Pas konferencës, pjesëmarrësit patën mundësinë të marrin pjesë në një tryezë të rrumbullakët, që synon të nxisë një dialog të hapur rreth trendeve dhe praktikave më të mira për zhvillimin e AAP-së në rajon.
GreenBridge përfaqëson një përpjekje të përbashkët për të ndërtuar ura bashkëpunimi ndërmjet arsimit profesional dhe nevojave të tregut të punës, duke kontribuar në një të ardhme më të qëndrueshme, gjithëpërfshirëse dhe të drejtë për të rinjtë në Kosovë dhe më gjerë.
Projekti zbatohet nga një konsorcium ndërkombëtar i përbërë nga Cleantech Bulgaria (koordinator), B+P nga Malta, FabLab dhe SSC “Nedžad Ibrišimović” nga Bosnja dhe Hercegovina, si dhe The Balkan Forum dhe Agjencia për Arsimin dhe Aftësimin Profesional dhe Arsimin për të Rritur nga Kosova./EO/Katror.info
