Vendimi i Zyrës së Rregullatorit për Energji (ZRRE) për shtrenjtimin e energjisë elektrike ka nxitur reagime të forta nga sektori privat. Aleanca Kosovare e Bizneseve (AKB) ka shprehur shqetësimin e saj për ndikimin negativ që ky vendim ka pasur te bizneset, veçanërisht ato prodhuese.
Në një konferencë për media, kryetari i AKB-së, Agim Shahini, deklaroi se kalimi i detyrueshëm i bizneseve në tregun e hapur të energjisë do të rrisë ndjeshëm kostot e operimit dhe do të rëndojë edhe më shumë sektorin privat.
“Aleanca shpreh shqetësimet me vendimin e ZRRE-së, që i ngarkon drejtpërdrejt bizneset. Vendimi i tyre do të sjellë pasoja. Rritja e çmimit është një rritje e madhe dhe detyrimi i kompanive me fitim mbi 10 milionë që të paguajnë 3-5 herë më shtrenjtë, kjo do të cenon konkurrencën dhe krijon pabarazi ekonomike,” tha Shahini.
Mundesh me e lexu edhe…
Ai kërkoi që vendimi i ZRRE-së të rishqyrtohet, duke apeluar gjithashtu te Qeveria për të ofruar subvencione dhe masa mbështetëse, sidomos për ndërmarrjet prodhuese që tashmë po përballen me sfida të shumta ekonomike.
Sipas AKB-së, liberalizimi i tregut të energjisë duhet të shoqërohet me masa mbrojtëse dhe të drejtë për bizneset, në mënyrë që të mos rrezikohet qëndrueshmëria e tyre financiare dhe pozita konkurruese në treg./Katror.info
