Këshilli i Investitorëve Evropian në Kosovë (EIC) ka bërë thirrje për një dialog gjithëpërfshirës dhe të koordinuar lidhur me procesin e liberalizimit të tregut të energjisë elektrike në vend, duke theksuar nevojën për një qasje të kujdesshme që merr parasysh sfidat me të cilat përballet sektori privat.
Në një deklaratë për media, EIC tha se ndan shqetësimet e komunitetit të biznesit lidhur me ndikimet që tranzicioni drejt një tregu të hapur mund të ketë.
“Duke mirëkuptuar rëndësinë e këtij procesi për zhvillimin e tregut dhe integrimin evropian, EIC thekson nevojën për qasje të kujdesshme, gjithëpërfshirëse dhe të koordinuar”, thuhet në komunikatë.
Mundesh me e lexu edhe…
Sipas Këshillit, për të pasur një reformë të suksesshme, është thelbësore që tranzicioni të jetë gradual dhe i mirëmenaxhuar.
“Përgatitja graduale, informimi transparent dhe mbështetja për bizneset gjatë fazës së tranzicionit janë thelbësore për t’u siguruar që liberalizimi të sjellë përfitime reale dhe të qëndrueshme për ekonominë,” thuhet më tej.
Disa anëtarë të EIC kanë shprehur shqetësime konkrete për “mungesën e parashikueshmërisë, kostot e larta të ofertave fillestare dhe ndikimin e mundshëm që këto ndryshime mund të kenë në operimet dhe planet afatgjata të investimit”.
EIC ka inkurajuar Zyrën e Rregullatorit për Energji (ZRRE) dhe institucionet përgjegjëse që të vazhdojnë të angazhohen në një dialog konstruktiv me përfaqësuesit e sektorit privat.
“Është e rëndësishme të merren parasysh specifikat e tregut të brendshëm dhe sfidat strukturore me të cilat mund të përballet veçanërisht sektori privat në Republikën e Kosovës”, thekson Këshilli.
Në përfundim, EIC shpreh gatishmërinë për të kontribuuar me praktika ndërkombëtare dhe ide të qëndrueshme në këtë proces, duke theksuar se “këto duhet të përshtaten me realitetin dhe sfidat specifike të Kosovës në këtë hap të rëndësishëm përpara”./Telegrafi/Katror.info.
